Сумар дня на 25. мая 2026 р.

Приносиме вам сумар медияльной ґрупы ЛЕМ.фм+ на ден 25. мая 2026 р.

За нами Рутенале. Премію Василя Турока-Гетеша здобыла проф. Олена Дуць-Файфер

В минулый вікенд на Лемковині прошло 13. Медженародне Бієнале Лемківской/Русиньской Культуры – Рутенале. Дотля Бієнале все одбывало ся в Креници, а того рока першыраз другій ден подіі проходил в Высовій. На початку першого дня одбыло ся засіданя Світовой Рады Русинів. Пак на старым креницкым цмонтери одправлена была панахіда на гробі Епіфана Дровняка – Никыфоря та зложене квітя під памятником артисты на Бульварах Дітля. Одтамале перешол хоровід ансамблів до Старого Здравичного Дому на Креницкым Дептаку, де в бальовій сали одкрыты были выставы малюнку, ікон і фотоґрафій. Пак прошли там два концерты. Другій ден Бієнале зачал ся зложыньом квітя при памятнику в Устю Рускым. Пак подія перенесла ся до амфітеатру в Высовій, де мож было выслухати прелекцию о русиньскій культурі, і одбыл ся фіналовый концерт. Того рока на Бієнале запрезентували ся артисты з: Польщы, Словациі, Украіны, Румуніі, Мадяр, Хорвациі і Сербіі. Традицийно, прошло тіж вручыня Преміі Василя Турока-Гетеша, котру здобыла проф. Олена Дуць-Файфер. Премію підчас Бієнале вручал председа Світового Конґресу Русинів др Штефан Лявинец. Ґратулюєме!

ПСК, КСК і Закарпатска област основают Европейскє зґрупуваня територияльной спілпрацы

Пряшівскій і Кошыцкій Самосправный Край основают вєдно з Закарпатском Областном Радом Европейскє зґрупуваня територияльной спілпрацы Выгорлят. Цілю є посилнити черезграничну спілпрацу в реґіоналным розвитку, культурі, економіці, але і обшырях транспорту ци еколоґіі. Основаня зґрупуваня і членство схвалил крайскій парлямент ПСК на своім засіданю 18. мая тр. Дрібниці чытайте в дописі на нашым порталю.

Зачал ся 14. Русиньскій Фестіваль в Свиднику

Днес початок 14. річника Фестівалю Культуры Русиинів Словациі – Русиньского Фестівалю, котрого головным орґанізатором є Окресна Орґанізация Русиньской Оброды в Свиднику. Фестіваль потырват цілый тыжден. Днес в проґрамі одкрытя фестівалю в Піддукляньскым Освітнім Центрі і выклад о перлинах Карпат. Заран в Домі Культуры акторы Театру Александра Духновича вкажут пєсу з назвом «Полепетко». В середу в Піддукляньскій Бібліотеці Інститут Русиньского Языка і Культуры Пряшівского Універистету просит на бесіду о русиністиці в школі. В четвер буде 11. Фестіваль Віры, в рамках котрого одправлена буде грекокатолицка св. Літургія в русиньскым языку. В пятницю зачне ся головна част фестівалю – в свидницкым амфітеатрі, і потырват до неділі. В проґрамі на пятницю єст м.ін. 7. річник Фестівалю Орфеус – музичной переглядкы авторской русиньской творчости і выступы фольклорных колективів. В суботу запрезентує ся м.ін. ПУЛьС з Пряшова – єдиный в світі професийный русиньскій ансамбль. В послідній ден подіі запрезенуют ся домашні ансамблі і гості. Фурт іщы можете придбати онляйн 3-дньовы білеты вступу.

Показ фільму «Мій Никыфор» і опроваджаня по выставі «Никыфор. Феноменон саморідного таланту» в Ліґници

Музей Міди в Ліґници, Нижньошлезскій Фільмовый Центр і Кіно Пяст в Ліґници просят на специяльный показ фільму «Мій Никыфор», в рамках Фільмового Клюбу Сеньора. Подія одбуде ся заран, в віторок 26. мая. Зачне ся од опроваджаня по выставі «Никыфор. Феноменон саморідного таланту» в Музею Міди в Ліґници, якє заплянувано на год. 14:30. Вступне дармо. Пак, о 16.00 год. в Кіні Пяст одбуде ся показ фільму «Мій Никыфор». Білеты на фільм мож придбати в касах або на сайті кіна.