Сумар дня на 25. серпня/авґуста 2022 р.

Приносиме вам сумар медияльной ґрупы ЛЕМ.фм+ на ден 25. серпня/авґуста 2022 р.

Вересньове поломництво на Святу Гору Явір

В липци/юлию проходили два поломництва на Святу Гору Явір – перше, православне на праздник свв. Апостолів Петра і Павла, а пак грекокатолицкє. 10. вересня/септембра грекокатолицкы вірны орґанізуют дальше піше поломництво з нагоды 97. річниці обявлінь. 8. вересня/септембра 1925 р. три Лемкыні з Высовы вертали з посвячыня римокатолицкой каплиці в словацкым Ґабольтові. Вертали в ночы, бо хотіли неспостережено перейти «зелену границю». По тым як перешли на польску страну клякли, жебы подякувати за щестливе поверніня. Як раз товды отримали надприродный знак, котрый был заповідю дальшых подій. З той нагоды поломникы выйдут з Пряшівской Руси (Курів – Ґабольтів – Цигелька) і підут на Святу Гору Явір, яка находит ся уж на Лемковині. Там о 18.00 год. буде одслужена Велика Вечырня.

Калиняк з попертьом партиі Hlas-SD

Як сме інформували, наш родак Михал Калиняк стартує на председу Пряшівского Самосправного Краю. Як раз мимопарляментарна партия Hlas-SD підтримує сучасного центрального директора Канцеляриі Здружыня Міст і Сел Словациі на посаду председы Пряшівского Самосправного Краю. Лідер партиі Петер Пеллеґріні повіл тото в понедільок на пресконферециі в Пряшові. Калиняк свою кандидатуру потвердил початком серпня/авґуста. Буде кандидувал як громадяньскій кандидат. Як повіл Пеллеґріні, в проґрамі, котрый му Калиняк презентувал, видит конкретны можливости рішыня проблемів краю. Калиняк представит свій проґрам кінцьом того місяця. Має він быти одповідю на біду в селах, реаґує на звекшыня безпекы, розвиток туристичного руху і черпаня еврофондів.

Серенча просит на свій ювілейный концерт

Лемківскій Фольковый Ансамбль «Серенча» святкує 25 років свойой діяльности. З той нагоды в неділю, 4. вересня/септембра, ґрупа заграт ювілейный концерт. Вшытко одбуде ся на спортовым пляци в Білянці при Ґорлицях. Окрем концерту ґаздів, якы будут споминати своє 25-літя, выступлят тіж з новым репертуаром заприязнены колективы Ґалицийскій Квартет і Хор Бельферсінґерс. Серенча была основана в 1997 р. Романом Корбичом, Петром Квоком і Мирославом Трохановскым. В своім артистичным доробку ґрупа має демо з 1998 р. та 5 платен: «Під облачком», «Зеленым гадвабом», «Поза гумен», «Ой ле лем» і выдану перед двома роками «А ты, одкале…?». Інспірує іх традицийна лемківска музика, якій дают нове, цікаве звучаня. Серед лемківской соспільности выступуют найчастійше на лемківскых ватрах ци фестівалях. Медияльный патронат над подійом тримат наше радийо ЛЕМ.фм.

На ратунок цмонтерям в Лабовій і Чырній

Припоминаме і заохочаме долучыти до хосенной акциі. Од 5. до 10. вересня/септембра мож буде взати участ в каменярскых варштатах орґанізуваных Лемківскым Ансамбльом Пісні і Танця «Кычера». В тогорічній едициі працы будут проходити на цмонтери в Лабовій, але окрем того першыраз діяня будут розшырены о стары лемківскы памятникы на цмонтери в Чырній. Тоты, якы хотят сперти акцию веце як єден ден, прошены сут о контакт через фейсбуковый сайт Каменяре Кычеры або высланя зголошыня на майльовый адрес remontlabowa@gmail.com. Орґанізаторы забезпечают нічліг і ідло. Завдякы дотеперішнім таборам повело ся упорядкувати і одновити більшіст памятників на лабівскым цмонтери, якій іщы перед парома роками был в плянах до ліквідациі. Находят ся на ним прекрасны памятникы, а то єден з найбільшых нашых цмонтерів в тій части Лемковины.