Приносиме вам сумар медияльной ґрупы ЛЕМ.фм+ на ден 26. червця/юнія 2020 р.
Ґорлицкій шпыталь з дотацийом веце як 2 млн зл
Специялистичный Шпыталь в Ґорлицях остал єдным з бенефіциєнтів Медичного Пакєту Малопольского Антикризисового Щыту. Символичный чек на квоту близко 2 млн 340 тис. зл отримал директор єдиниці Мариян Слюсаж (Ślusarz). До переданя чеку дошло в тарновскій замісцевій аґенді Маршалківского Уряду Малопольского Воєвідства, де присутны были м.ін. маршалок воєвідства Вітольд Козловскій та представникы медичных інституций з тарнівского і сандецкого обшырів, якы так само достанут фінансову поміч. В сумі переданых буде близко 10,6 млн зл з унійных середків. За тоты грошы шпытальны одділіня будут выпосажены модерном апаратуром. Медичны єдиниці в реґіоні будут мати вісем новых амбулянсів. Поміч шпыталям то першый з шестьох пакєтів Малопольского Антикризисового Щыту. Фінансуваны будут іщы пакєты підприємства, фінансовой стабільности, соспільный, едукацийный і пакєт розвитку. Разом буде того праві 1 млд зл. Грошы походят з Европейскых Фондів, буджетів державы і воєвідства.
Ґорлицкій Повіт і Місто Ґорлиці просят о поміч послів
В середу, 24. червця/юнія, прошло в Повітовым Старостві в Ґорлицях робоче засіданя Штабу Кризисового Заряджаня в справі омовліня актуальной ситуациі тыкаючой веце як 5 тис. тон одпадів і небезпечных субстанций на обшыри бывшой Рафінериі Нафты Ґлімар. З комунікату ґорлицкой старосткы Мариі Ґубаы выникат, што з теперішньом критичном ситуацийом локальны самоуряды не сут в силі самы сой порадити. Старостка пояснят дале в писмі, што брак є дотепер ефективной підпоры зо страны орґанів урядовой адміністрациі та орґанів з воєвідского рівня. Старостка і бургомайстер Ґорлиц Рафал Кукля рішыли, што будут просити дале о поміч послів з округів 14 і 22, жебы підперти місто здобыти грошы на забезпечыня і усуніня одпадів, та дальшый раз підут до Міністерства Середовиска. Будут інформувати власти малопольского і підкарпатского воєвідств про збільшаючу ся загорозу вытіканя небезпечных субстанций до земли і до воды або загорозу самозапаліня тых одпадів, а тым самым конечніст заанґажуваня служб Воєвідского Центру Кризисового Заряджаня в обох воєвідствах.
При дорозі поставили сітку, жебы органичыти міґрацию диків
Більше як 30-кілометровый одтинок державной дорогы но 12, якій веде через ґлоґівскій і польковицкій повіты, огородили сітком. Зробила тото Ґенеральна Дирекция Державных Доріг і Автострад, котра хоче в тот спосіб ограничыти міґрацию диків зараженых африканьскым мором свинь. Въізды на поля ведут през специяльны брамы, котры треба заперати. То апель до ґаздів, жебы так робили. Подібны діяня в звязку з выступуваньом віруса африканьского мору свинь ввели на Нижнім Шлезку уж скорше, вздолж інчых державных доріг: С5 [S5], С3 [S3] ци А4.
Заперты туристичны пути
Кєд при вікенді плянували бы сте піше вандрувати по горах, возте до увагы, што часово закрыли пути в Бєщадах. Закрытя шляків звязане є з повітряным транспортом материялів потрібных до ремонту пути. Од вчера заперты сут шлякы: Букове Бердо – Кремінь та Устрикы Выжні – Шырокій Верх – перевал під Тарницьом, а од днес до полудня трасы: Велика Равка – Мала Равка та вшыткы входы на Цариньску Полонину.
Нове до почытаня од бачваньскых Русинів
На выдавничій поличці бачваньскых Русинів явили ся дві новы публикациі. Першом є пятый том зобраных творів Гавриіла Костельника пн. «Чловек і світ». Том скалдат ся з двох книжок, перша – пн. «Три розправы о спознаню», то філософічны есеі, друга – «Границі демократизму» – то социйолоґічны розправы. Вводне слово до тому написал академік Юлиян Тамаш, автором перекладу є Дюра Латяк. Другом напечатаном в остатнім часі серед Русинів Сербіі книжом є збірка приповідок авторства Юлияна Тамаша пн. «Тріскы з великой душы». В збірці нашло ся 50 приповідок списаных в 90. роках минулого столітя.
Фот. Краківска Ґазета
Коментарі