Сумар дня на 26. червця/юнія 2023 р.

Приносиме вам сумар медияльной ґрупы ЛЕМ.фм+ на ден 26. червця/юнія 2023 р.

Просиме на соспільны консультациі до Руской Бурсы!

Припоминаме, што уж в тым тыжни, в суботу 1. липця/юлия в Рускій Бурсі в Ґорлицях пройде консультацийна стріча в справі вписаня на Державный Спис Нематерияльной Культурной Спадковины лемківского языка і лемківской культуры. Подія зачне ся о 15.00 год. і прошены сут на ню вшыткы Лемкы, котры ідентифікуют ся з лемківскым языком і лемківском культуром. Консультациі орґанізуваны сут Стоваришыньом «Руска Бурса» в Ґорлицях і Стоваришыньом Лемків.

Крениця рыхтує документацию перед будовом новой інвестициі

Крениця переняла остатні ділянкы під плянувану будову штучно мороженого санечково-бобслейово-скелетонового тору на горі Івонка. Місто похвалило ся дальшом концепцийом і технічныма даныма стратеґійной для ґміны інвестициі. Понад штырі рокы тому не повело ся побудувати тору на Парковій Горі, а по выбраню нового місця вшытко треба было зробити од початку. Тепер, по 4,5 рока ґміні повело ся схвалити Студиюм Напрямів і Обставин Просторного Заґаздуваня, передвидуюче будову тору на горі Івонка. Крениця має тіж уж концепцию тору разом з вычысленом долгістю тору, скорістю і формом і вшыткы потрібны ґрунты. Актуально єст процедуваный новый плян просторного заґаздуваня, котрый найпевнійше буде схваленый до половины будучого рока. Дальшым кроком буде позысканя проєкту і рішыня позволіня на будову.

В Кошыцях одпремєрували фільм o Варголи

В Кошыцях од 16. до 23. червця/юнія проходил 29. річник медженародного фільмового фестівалю Art Film Fest. Публика могла обзерати 146 фільмовых продукций зо штырьох континентів. Медже тыма фільмами нашол ся і такій про єдного з найвекшых світовых артистів з русиньскыма коренями – Енді Варголя. В четвер 22. червця/юнія одбыла ся на фестівалю цілосвітова премєра ціловечернього документального фільму пн. «Енді Варголь – америцкій сон», в режысериі Яна Любоміра Сливкы і сценоґрафіі Петры Бабіч Сливковой. Копродукцийным партнером нового фільму єст Музей Модерной Штукы Енді Варголя в Меджелабірцях. Фільм пришол представити з США єден з його протаґоністів, сын брата Енді Варголя, вызначный книжковый ілюстратор Джеймс Варголя. Акция фільму проходит в Миковій, Меджелабірцях, Пітсбурґу і в дальшых місцях обох континентів. Продукция достане ся до дистрибуциі аж на осін будучого рока. В Кошыцях фільм был прємєруваный іщы в часі процесу творіня. Веце о образі прочытате на нашым портали.

Михалівска команда ОСП найліпша в ґміні

В минулу суботу 24. червця/юнія проходили ґмінны спортово-пожарничы змаганя Охотничой Протиогньовой Стражы ґміны Хоцянів. Радо інформуєме, же перше місце в змаганях заняла команда ОПС Михалів. Пожарникам, серед котрых єст і сильна лемківска репрезентация, повело ся тіж выграти нагороду за найліпше бойове прирыхтуваня, фундувану бургомайстром міста і ґміны Хоцянів. Ґратулюєме!

Фот. Janusz Lech (за фб сайтом Ochotnicza Straż Pożarna Michałów)