Сумар дня на 26. квітня/апріля 2021 р.

Приносиме вам сумар медияльной ґрупы ЛЕМ.фм+ на ден 26. квітня/апріля 2021 р.

Онляйнова бесіда про значыня повсеюдного спису для меншын

Стоваришыня Етноґрафічна Працовня і Працовня Великій Покій просят на онляйнову бесіду пн. «Рахуєме ся? Меншыновы ґрупы в однесіню до повселюдного спису». Пройде она в четвер 29. квітня/апріля о год. 18.30 на фейсбуковым сайті подіі. Як пишут орґанізаторы, даны зобраны в Нацийональным Повселюдным Списуваню 2021 будут наступных 10 років будувати образ Польщы і будут основом вельох рішынь урядовой і самоурядовой адміністрациі. В часі стрічы специялисты і меншыновы активісты подумают м.ін. над такыма проблемами: яку вагу мают нашы одповіди на звіданя о віроісповіданя або нацийональніст і як результаты спису можут влияти на ситуацию поєдных меншын в Польщы. Звернут тіж увагу на значыня способу творіня звідань в списовым формуляри і кого в списі бракує. Будут бесідувати і о звязаных зо списом дилемах меншыновых активістів ци о проблемах з Нацийональным Повселюдным Списуваньом 2021, смотрячы на ситуацию ріжных меншыновых ґруп.

При дорогах в Шымбарку, Квятоновицях і Быстрій заінсталюют новы світла

До кінця листопада/новембра того рока при дорогах в трьох місцевостях в сельскій ґміні Ґорлиці, Шымбарку, Квятоновицях і Быстрій, заінсталюване буде освітліня. Новы світла плянуют поставити м.ін. на дорозі в Шымбарку при DK 28 до границі з Ропом і околицях крижівкы в страну Білянкы. Освітлена має тіж быти повітова дорога в Квятоновицях та одтинок повітовой дорогы Шымварк – Быстра – Шальова в Быстрій. Цілковитый кошт інвестициі то веце як 240 тис. злотых.

Выстава творів Епіфана Дровняка і Едварда Двурніка

Од 23. квітня/апріля в DESA Unicum в Варшаві мож обзерати выставу творів двох вызначных артистів, лемківского мастера непрофесийональной штукы Епіфана Дровняка і польского творцю модерной штукы Едварда Двурніка. Як бесідувал сам Двурнік, Никыфор был його найважійшым мастером, по правді єдиным. В своій творчости свідомі інспірувал ся образами креницкого маляря. Выстава «Никифор/Двурнік. Діалоґ Мастерів» попередит авкцию образів, яка пройде в Авкцийным Домі DESA Unicum в Варшаві 29. квітня/апріля.

Европейскій Біговый Фестіваль в Креници одбуде ся в вересни/септембрі

Як інформує бургомайстер Крениці Пьотр Рыба, Европейскій Біговый Фестіваль одбуде ся зараз по Економічным Форум. Вшыткы головны бігы пройдут в першый вікенд вересня/септембра тр. Трасы Фестівалю ведут Сандецкым Бескідом (м.ін. Креницка Яворина і Галя Лабівска) та Низкым Безкідом (м.ін. Лацкова і Лан). Орґанізатором Европейского Бігогово Фестівалю єст «Фундация на Ратунок». Як фундациі не поведе ся зрыхтувати обох подій в так короткым часі, то плянуваны на 28.-30. мая Креницкы Гірскы Вігы «Tour de Zbój» будут перенесены на 4.-5. грудня тр. Записы на Европейскій Біговый Фестіваль мают быти одкрыты о пару днів.