Сумар дня на 26. листопада/новембра 2020 р.

Приносиме вам сумар медияльной ґрупы ЛЕМ.фм+ на ден 26. листопада/новембра 2020 р.

Грекокатолицкій Русиньскій Календар 2021

Вышол Грекокатолицкій Русиньскій Календар на 2021 р. Єст він вєдно з часописом Артос реґулярні выдаваный в рамках діяльности Общества св. Йоана Крестителя на Словациі. Публикация приносит церковный календар за юлияньскым і григорияньскым стилями, много інтересных статій на церковны і історичны темы. Статі сут писаны кірилицьом або латинком в русиньскым языку. Во вступным слові о. Ярослав Поповец, председа Общества, пошырил радістну віст про вшыткых Русинів. Приготовлене є уж русиньскє тлумачыня Нового Завіту. Покля што не знатя, коли буде Новый Завіт по русиньскы напечатаный. Слово архіпастыря приготовил до календаря владыка Мілан Лах, єпарха Пармской Єпархіі в ЗША. Владыка в своім пастырскым слові апелює на актуальну тему – на повселюдне списуваня, котре пройде в 2021 р. Владыка сам признає, же єст Русином, грекокатоликом. Заохочує, жебы люде подавали свою русиньску нацийональніст, на котру треба быти гордым. Хто бы хотіл придбати тогорічный Грекокатолицкій Русиньскій Календар на 2021 р., най ся контактує з грекокатолицком парохійом в Зубным на Пряшівщыні, де находит ся редакция выданя.

Нова грекокатолицка єпархія в Польщы

Як поінформувала вчера Апостольска Нунциятура в Польщы, папа Франциск поблагословил рішыня Синоду Єпископів УГКЦ што до покликаня новой, третьой грекокатолицкой єпархіі на териториі Польщы. Владыком новой ольштыньско-ґданьской єпархіі был выбраный о. Аркадий Трохановскій, дотеперішній парох в Валчы, в старій вроцлавско-ґданьскій єпархіі. Як чытати мож в комунікаті Апостольского Нунция, до часу канонічного обнятя єпархіі через нового владыку, обовязкы адміністратора ольштыньско-ґданьской єпархіі полнил буде митрополита перемышльско-варшавскій архієпископ Євгеній Попович. Катедром новой єпархіі буде місто Ольштын на Варміі. На обшыри новоствореной єпархіі, подібні як і в цілій УГКЦ в Польщы, вірныма поєдных парохій окрем Украінців сут так само Лемкы. Новый владыка Аркадий Трохановскій має лемківскє коріня.

Потягы з Ґорлиц до Кракова штоденні

Містецкій Уряд в Ґорлицях інформує, што од 13. грудня/децембра 2020 р. діял буде новый розклад потягів PKP. Подля новой розпискы жытелі Ґорлиц і околиц будут мочы штоденно подорожувати до Кракова і назад. Оферту обслугувало буде PKP Intercity. Потягы будут одходити зо стациі Ґорлиці-Заґужаны. Згідно з розкладом потягы з Ґорлиц будут одходити о 7.13 і 16.53 в робочы дни. З Кракова потяг буде ходил о 9.44 і 19.22 в робочы дни. Фурт ходит і вікендовый потяг. На вшыткы получыня обовязувати будут уставовы знижкы, м.ін. про неполносправны особы, учеників ци студентів. Детальный розклад глядайте на сайті PKP.

До 30. листопада/новембра мож посылати конкурсовы працы

Припоминаме, же Стоваришыня «Руска Бурса» в Ґорлицях просит до участи в плястичным і літературным конкурсі. До выграня барз атракцийны нагороды. Того рока проходит сотна річниця народжыня лемківской поетесы Меляніі Собин. З той нагоды просиме охочы діти (до 9 рока жытя) намалювати образок (свобідном техніком), котрый буде інтерпретацийом выбраного верша Собин. Для старшых учеників пропонуєме конкурс, в котрым можут выказати ся креативністю в писаню. Задачом є написати твір на тему «Скарб мойой бабы/ мого діда», в котрым опишут тото, што є цінным для іх прародичів, чому не дадут пропасти, што хотят сохранити. Творы оцінюваны будут в двох катеґориях: школярів в віку 10-12 років та 13-15 років. Найліпшы творы будут опубликуваны на сайті лем.фм, де найдете тіж деталі і реґулямін конкурсу. Конкурсовы працы можете высылати до 30. листопада/новембра.