Сумар дня на 26. листопада/новембра 2021 р.

Приносиме вам сумар медияльной ґрупы ЛЕМ.фм+ на ден 26. листопада/новембра 2021 р.

Завершена консервация кіриличных стародруків

Результаты тогорічной консервациі церковных стародруків веденой Єпархіяльным Осередком Православной Культуры в Ґорлицях мож уж обзерати в інтернеті. Презентация результатів прац і здіґітализуваны обєкты были поміщены м.ін. на офіцияльным вебсайті Осередка. Реализуваный в тым році проєкт пн. «Продолжаня консервациі збіркы кіриличных стародруків» был дофінансуваный з Міністерства Культуры, Нацийональной Спадковины і Спорту. В його рамках были підданы консервациі три стародрукы зо збіркы Осередка – книгы з періоду І Республикы, выдрукуваны в львівскій братскій друкарни: Євангелия з 1670 р., Октоіх з 1686 р. та Псалтыр з 1668 р. Всітри обєкты являют ся рідкыма еґземплярями в польскых збірках і тішат ся великым заінтересуваньом дослідників. Консерваторскы працы дозволили сохранити книгы перед цілковитом деструкцийом, привернути ім як найбільше елементів первістного стану і в тот спосіб заховати для потомных барз цінны історичны і культуровы обєкты. Кодексы мают інтересуючы одручы вписы, якы тыкают м.ін. погодовых аномалий, меджелюдскых одношынь ци історичных подій. В тым році в рамках проєкту окрем консервациі была додатково проведена діґітализация Псалтыря.

«Бескід без Кіту. Зима» в передпродажы

Як поінформувало на своім фейсбуковым сайті выдавництво Лібра, о кус веце як два тыжні вкаже ся нова публикация, на яку вельох чытачів ждало од часу премєры бестселеровой уж книжкы пн. «Бескід без Кіту». Наступну книжку Мариі Стшелецкой пн. «Бескід без Кіту. Зима» мож уж тепер придбати в передпродажы на вебсайті выдавництва. Місце акциі книжкы то зимова Лемковина в двадцетых роках ХХ столітя. Прочытаме в ній о трьох дівчатках, котры жебы ратувати вітця – каменяря, рушают в богату в несподіванкы бескідску зимову подорож. Фоном для ней сут дика природа Бескіду і штоденне жытя лемківкого села. Публикация єст богато ілюструвана одбитками дереворытів, што были вытяты авторком з бескідской зваленой липы.

Дальше дофінансуваня на солянковы інгаляториі в ґорлицкым повіті

В рамках воєвідского проґраму «Малопольскы солянковы інгаляториі» реализуваны сут дві інвестициі на обшыри ґорлицкого повіту. Обі інгаляториі, в Ґорлицях і в Бобовій, мают быти готовы іщы в тым році. В часі остатньой сесиі соймик воєвідства передал на інвестициі дальше дофінансуваня. Як подал бургомайстер Ґорлиц Рафал Кукля, цілковитый кошт будовы інгаляториі то 378 тис. злотых, з чого первістне дофінансуваня вынесло 128 тис. злотых. По остатній сесиі соймику місто отримало додатковы середкы, што значыт, же Ґорлиці достали найбільше можливе дофінансуваня в высокости 250 тис. злотых. Так само позитивну зміну принесла послідня сесия для Бобовой. Попередньо дофінансуваня покрыло лем ок. 1/3 коштів будовы інгаляториі, тепер до села трафит двараз веце грошів, што покрыє цілковитый кошт інвестициі.

Ближыт ся Ден Русинів в Польщы

Ближыт ся 103. річниця фльориньского віче, якє дало початок Рускій Народній Республиці Лемків. 5. грудня/децембра єст і нашым нацийональным святом – Дньом Русинів в Польщы. З той нагоды Стоваришыня «Руска Бурса» в Ґорлицях і Стоваришыня Лемків просят вшыткых до спільного святкуваня. Святкуваня зачнут ся во Фльоринці, жебы в долинці перед плебанійом, де перед роками зобрали ся нашы предкы на віче, вшанувати іх памят і ідею Республикы. Дальша част тогорічного Дня Русинів в Польщы пройде в ґорлицкій Рускій Бурсі. Зачне ся она о 15.00 год. Др Анна Вільк выголосит выклад пн. «Довкола бадань над історийом і достоменністю Лемків». Пак буде артистична част, в якій молода композиторка з чужыны, Дария Текля Кузяк, заграт свій авторскій концерт пн. «Од традициі до сучасности». Сердечні вшыткых просиме до спільного празднуваня.