Сумар дня на 26. листопада/новембра 2024 р.

Приносиме вам сумар медияльной ґрупы ЛЕМ.фм+ на ден 26. листопада/новембра 2024 р.

Наступный етап модернізациі граду Любовня закінченый

Закінчыла ся реконструкция пілнічно-східньой сціны граду Любовня. Інформацию аґентурі TASR потвердил директор Любовняньского Музею Далібор Микулик. Роботы были ведены на третім і четвертым дворі. Четвертый двір єст уж цілый одводненый та і оправленый, зас на будуче лишыла ся ревітализация інтерєру археолоґічной експозициі і задашыня воєнськых касарен. Подібні треті двір, де піл рока ведены были археолоґічны досліджыня, єст уж одводненый, а на будуче лишыла ся реконструкция внутрішньй сціны на касарнях. Як повіл Микулик, головном цілю єст одводнити дворы, бо вода то найбільше загорожыня для будинків. Удало ся тіж зреконструувати студню. Актуально музей єст одкрытый каждый тыжден од пятниці до неділі, а на святочный час власти музею рыхтуют много атракций. Од 26. грудня/децембра до 7. січня/януара музей буде отвореный каждый ден, а одвиджаючы го будут мочы взяти участ в різдвяных концертах, послухати святочны приповідкы ци дознати ся, як засідала до стола шляхта, ци в літургіі на Богоявліня в деревяным храмі в скансені.

В Токаіку вспоминали 80. річницю Токаіцкой Траґедиі

В пятницю 22. листопада/новембра в селі Токаік проходила пєтна подія з нагоды 80. річниці Токаіцкой Траґедиі. Проходила при памятнику під назвом «Навернутя» авторства русиньского артисты, різбяря Франтишка Ґібалы. Участ в подіі взяли президент Словацкой Республикы Петер Пеллеґріні, а тіж многє чысло представників Пряшівского Самосправного Краю ци державной справы. Президент припомнул, што того рока припадат 80 років од выбуху Словацкого Народного Повстаня, а о рік 80. річниця закінчыня ІІ світовой войны. Голос забрала тіж старостка села Токаік, Яна Медвецова, котра підкрислила, як важне єст памятаня о істориі.

До 2027 рока ґміну Крениця буде освітлена уж лем ледовыма лампами

Як передал бургомайстер Крениці, Пьотр Рыба, до 2027 рока уличне освітліня в ґміні Крениця буде ся складало уж лем з ледовых ламп. Власти курорту зачали наступный етап проґраму «Розсвітляме Польщу». Протягом найблизшых місяців на обшыри міста, але тіж в шолтыствах будут монтувати дальшых 500 штук новых кінкєтів. Така інвестиция ся оплачат, што видно по рахунках за електричну енерґю. Аж і при остатніх збільшынях цін за електрику вдало ся в ґміні утримати постійны рахункы за уличне освітліня, а то завдякы хоснуваню енерґоощадного освітліня. Пляново до вересня/септембра 2025 рока содовы лямпы лишат ся лем на части єдной ул. Пілсудского в Креници. Самоуряд плянує, што од того моменту зачне ся остатній дволітній етап выміны освітліня в цілій ґміні.

«Na świętego Andrzeja wszystkim pannom nadzieja» – як ворожыли в Карпатах

Карпатскій Народный Університет просит на дальшу стрічу з циклю «Карпатскы слуховиска». Тым разом прелекция під назвом «Na świętego Andrzeja wszystkim pannom nadzieja» буде посвячена ворожыню. Інтернетовый выклад вела буде Каролина Сурувка, абсольвентка етнолоґіі і долголітня выкладовчыня. Прелекция пройде в середу 27. листопада/новембра о 17.00 год. Мотузок до стрічы находит ся на офіцийным фейсбуковым сайті Карпатского Народного Університету.