Сумар дня на 26. марця 2021 р.

Приносиме вам сумар медияльной ґрупы ЛЕМ.фм+ на ден 26. марця 2021 р.

В Польщы од заране новы рестрикциі 

Вчера, 25. марця, прошла конференция, на котрій польскій премєр Матеуш Моравєцкій і міністер здоровля Адам Нєдзєльскій представили актуальну епідемічну ситуацию в державі. Передали і спис новых ограничынь, якы будут обовязувати од 27. марця до 9. квітня/апріля. Закрыты остают гандльовы центры, з вынятком м.ін. склепів з ідлом, аптик, дроґерий, книгарен. Додатково закрыты будут вшыткы склепы будівляны і з меблями выже 2 тис. квадратных метрів. В інчых гандльовых пунктах, на торгу або почті, може быти максимально 1 особа на 15 м2 в склепах до 100 м2 і 1 особа на 20 м2 в склепах выже 100 м2. Ограничене буде і чысло осіб в обєктах реліґійного культу – максимально 1 особа на 20 м2 при захованю мінімально 1,5 м дистансу і обовязку закрывати ґамбу і ніс. Од суботы закрыты діяльніст мусят і салоны уроды, косметичны і фризиєрскы заклады. Не будут тіж діяти предшколя і дітячы ясла. Спортовы осередкы будут одкрыты лем для професийного спорту. Окрем того дале мают обовязувати епідемічны рестрикциі выголошены властями на попередній конференциі 17. марця, такы як: вчыня на дистанс в клясах 1-3 основных шкіл, закрыты готелі, театры, кіна, музеі, ґалериі штукы. Фурт обовязує заказ збераня ся в ґрупу веце як пятьох осіб. Як повіл міністер Нєдзєльскій, тоты котры приняли вакцину проти COVID-19, сут звільнены з посліднього ограничыня.

Знаны результаты поділу середків з гірского щыту

Знаны сут уж результаты поділу середків з гірского щыту, тє. урядовой підтримкы для ґмін вызнаных за гірскы. Ґорлицкій повіт отримат веце як 21 млн злотых. То середкы, котры мож передати на одбудову туристичного потенциялу ослабленого пандемійом. На обшыри повіту фонды зо щыту будут переданы для семох ґмін. Поза обшырю підпоры остали ґміны Бобова, Мощениця і Біч. Найбільшым бенефіциєнтом гірского щыту єст місто Ґорлиці, якє збогатит ся о близко 7 млн злотых. Як повіл бургомайстер Рафал Кукля, грошы плянуют схоснувати на працы при містецкых спортовых обєктах. З містецкой касы дадут на тото додаткове 1,5 мілийона. В рамках задачы выконане буде нове зовнішнє огороджыня спортового стадийону та задашыня вельофункцийного обєкту, якій літом фунґує як тенісовы корты, а зимом як ледовиско. Перебудуване і побільшене буде спортове боіско. Сельска ґміна Ґорлиці достане з гірского щыту близко 4,5 млн злотых. Грошы будут презначены на видокову вежу, яка буде побудувана на Лысули в Домініковицях. Кєд останут середкы по зреализуваню той інвестициі, будут они переданы на будову наступного видокового пункту в Квятоновицях. Ґміна Санкова отримат 3,8 млн злотых. Як повіла війт ґміны Санкова – Малґожата Малух, грошы будут схоснуваны на будову сусідуючого з істнуючом в Санковій спортовом інфраструктуром басену. 1,6 мілийона злотых, якє отримат Устя Рускє, буде передане на ремонт водного парку в Высовій. Ґміны Липинкы, Ропа і Лужна плянуют схоснувати грошы на розбудову канализацийных і водопроводных сіти і модернізацию очыщальні. Ґміна Лужна отримат понад 2 млн зл, Липинкы 1,5 млн, а Ропа кус більше як мілийон.

Апель в справі можливости самоспису в реґіональным языку

Ансамбль дс. молодіжной політикы при Генеральній Раді Кашебско-Поморской Асоцияциі переслал в середу, 24. марця, до председы Головного Статистичного Уряду апель в справі можливости самоспису в кашебскым языку. В писмі члены ансамблю выразили непокій звязаный з браком можливости в формуляри Нацийонального Повселюдного Спису Люди і Мешкань 2021 зробити самоспис в інчым языку як польскій. Покликали ся на уставу о нацийональных і етнічных меншынах та реґіональным языку, яка дає право хоснувати рідный язык в приватным і публичным жытю. Подля них, брак можливости самоспису в кашебскым языку, будучым єдиным вызнаным в державі реґіональным языком, не єст згідный з записами уставы. Апелювали до Уряду зрыхтувати кашебскоязычный формуляр і підтримувати потребы жытелів державы, якы хоснуют языкы інчы як польскій.

Ювілейна публикация выдавництва Чарне

Выдавництво Чарне з нагоды свойого 25-літя, в чест траґічно вмерлого лемківского писателя Мирослава Нагача, выдало нову публикацию. Поміщены сут в ній три повісти Мирослава Нагача: «Вісем Штырі», написане автором на 18 році жытя, «Бомбель», в котрым автор писал о темній страні жытя своіх єдносельчан в лемківскым селі, та «Боцан і Лоля» послідня выдана за жытя автора повіст. Книжку мож придбати через інтернетовый сайт выдавництва.