Сумар дня на 26. вересня/септембра 2019 р.

Приносиме Вам сумар медияльной ґрупы ЛЕМ.фм на ден 26. вересня/септембра 2019 р.

Памятник Жыдів в Ґрибові буде одкрытый 3. листопада/новембра т.р.

Тілько што сме інформували про збірку фондів на будову місця памяти ґрибівскых Жыдів, а тепер орґанізаторы заявили, што одкрытя памятника, будугочо головным пунктом проєкту «Люде, не чысла», одбуде ся уж 3. листопада/новембра т.р. На реченый проєкт думкодавці упамятніня страдавшых в голокавсті потрібували 15 тис. зл. Іщы перед парома днями тота сума не была зобрана, но тепер орґанізаторы інформуют, што повело ся на ґрибівскым кіркуті забезпечыти ґруповы гробы, в котрых спочывают помордуваны вчас німецкой окупациі. В рамках проєкту, м.ін. за збераны в інтернеті фонды, мают быти реалізуваны так само едукацийны проєкты для ґрибівскых шкіл. В ден одкрытя памятника, што зачне ся о 13.30 год., буде выміненых з імена і назвиска 1.777 осіб, котрым символично привернена буде памят. Серед осіб, котры нашли ся в ґрибівскым ґетті, а пак были замордуваны в еґзекуциях, або вывезены до німецкого концентрацийного лаґру в Белжци, были так само жыдівскы жытелі лемківскых місцевости, наприм. Крениці ци Мушыны. На упамятніня приіхают родины помордуваных, потомны з заграниці. Буде молитва рабина і священників без огляду на віроісповіданя. Більше про саму ідею упамятніня чытайте в статі на нашым портали.

Іконы з Новиці в Новым Санчы

Од 21. вересня/септембра в Ґаліцийскым Місточку в Новым Санчы обзерати мож іконы з Новиці. То експоциция презентуюча творы выконаны артистами вчас минулых ХI Медженародных Варштатів Іконописців. Выстава є з наголовком Псалмы. Іконы выходят спід рук іконописців з Польщы, Украіны і Білоруси. Заміреным выставы, як і самых варштатів, є представляти вельовіковый сакральный кумшт Польской Республикы. Во вшытых едициях берут участ люде ріжных нацийональности і віроісповідань. В дотеперішніх новицкых пленерах взяло участ веце як 200 артистів, а іх працы были выставлюваны уж на 60 выставах. Новосандецка выстава є єдном з дальшых, на котрій будут вказуваны тогорічны результаты варштатів. Мож єй видіти до 20. жолтня/октобра т.р.

В вікенд Свято Рыджыка в Высовій

12. едиция Свята Рыджыка пройде в найблизшу суботу і неділю в Высовій. Тото особливе свято орґанізуване є выключні на обшыри Лемковині і притігат любителів збераня грибів та самых рыджыків з цілой Польщы. Головном частю проґраму є конкурс Полюваня на Рыджыка. Рівнолегло проходити будут розмаіты варштаты і прелекциі, а на неділю заплянувано концерт Капелі Ганкы Вуйцяк. Подія проходила буде на обшыри Здройового Парку в Высовій.

Лемківскій Кєрмеш в Йонкерсі

Такой о місяц, 20. жолтня/октобра, в Зъєднаных Штатах Америкы одбуде ся шторічный Лемківскій Кєрмеш в Йонкерсі, на котрый просит Карпаторусиньскій Америцкій Центр Лемко Голь (Lemko Hall). Подія зачне ся о 15.00 год. за місцевым часом. Для участинків передвиджено як што рока вельо атракций, в тым смачны стравы і напиткы. В попередніх едицициях Леківского Кєрмешу были рыхтуваны специяльны ґаджеты для участників, а то кошелькы з патріотичныма гаслами, мапом Карпатской Руси і русиньскым гербом. На тогорічным Кєрмешы о забаву постарат ся ґрупа Lem Joy Trio. Чысло місц єст ограничене, зато орґанізаторы просят о скоршу резервацию, максимяльно до 9. жолтня/октобра.