Сумар дня на 27. грудня/децембра 2024 р.

Приносиме вам сумар медияльной ґрупы ЛЕМ.фм+ на ден 27. грудня/децембра 2024 р.

Православна церков припомне річниці важны для лемківской соспільности

В минулым тыжни, 21. грудня/децембра одбыло ся Загальне Згромаджыня Братства Православной Молодежы Перемышльско-Ґорлицкой Єпархіі, получене з реколекциями перед святом Різдва Христового. Окрем чысленно згромадженой молодежы в подіі брали участ священникы: о. Андрий Ґрич, о. Юлиян Феленчак, о. Ян Антонович, о. Михал Коник і о. Ярослав Ґрич. Підчас стрічы вызначены были ціли братства на найблизшы рокы, звязаны зо святкуваньом церковных річниц, особливо важных для лемківской православной соспільности. В будучым, 2025 році празднуване буде 100-літя Обявлінь Богородиці на Св. Горі Явір. А о рік, в 2026 р., одзначене буде 100-літя Повороту Лемків до Православія. На стрічы бесідуваны были і діяня ведены єпархіяльным братством в текучым році, до котрых належат найважнійшы цикличны подіі, т.є. поломництва на Святу Гору Явір і свято священномученика Максима Ґорлицкого, ци празднуване в тым році 100-літя автокефалиі Польской Автокефальной Православной Церкви.

В Креници будуют дальшы туристичны атракциі

Уж в найблизшым літнім сезоні мают быти одкрыты дві новы атракциі на Парковій Горі в Креници. Як інформувал бургомайстер Крениці Пьотр Рыба, завершыли ся працы зваязаны з палюваньом видоковой вежы на Парковій Горі. Важна для курорту інвестиция має быти готова літом 2025 р. Видокова вежа, котрой будова уж ся зачала, буде высока на 36 м. Буде ся складала з зовнішнього тарасу 360 градусів та шкляного внутрішнього простору, што позволит обзерати видокы цілый рік незалежно од хвилі. Як подал інвестор, Польскы Кабельны Желізниці PKL, на верху вежы буде специяльный выкуш зо шкляном підлогом. Вежа буде продолжыньом ідеі Подорожы в часі – получыньом модерной конструкциі зо стильом ретро. Єдночасно на Парковій Горі в Креници реализує ся іщы єдна велька інвестиция – Поляна Музикы і Світла. Атракция буде навязувала до символикы Крениці і так само буде континуацийом Подорожы в часі. І тота атракция має быти готова на літо 2025 р.

Вершы лемківскых поєтів в музичній інтерпретациі Серенчы

Лемківскій Фольковый Ансамбль Серенча працує над новым музичным проєктом. Премєровы выконаня фольк-поезиі до музикы Мирослава Боґоня і текстів поетів з Погіря і Лемковины мож было недавно почути на концерті в Домініковицях. Серенча взяла на музичный варштат поезию Павла Стефановского, Петра Мурянкы і Кшыштофа Ґомолы. Під конец будучого рока має ся явити цедечко, на котрым найдут ся новы творы.

Концерт русиньскых коляд в Уличскым Кривым

Заран, в суботу 28. грудня/децембра в Уличскым Кривым в окресі Снина одбуде ся подія з назвом «Еха коляд». Буде то стріча при велийній капусті і русиньскых колядах, орґанізатором сут Еха Волчых Гір. В рамках концерту русиньскых коляд запрезентуют ся ансамблі Полонина, Бетлегемці, Сорочка та Домініка Новотна. Окрем того в проґрамі єст обсервация неба і выклад працівника Выгорлятской Звіздарні в Гуменным о Віфлеємскій Звізді. Буде і нагода придбати сой реґіональны продукты. Подія зачне ся о 14.00 год.