Сумар дня на 27. квітня/апріля 2020 р.

Приносиме вам сумар медияльной ґрупы ЛЕМ.фм+ на ден 27. квітня/апріля 2020 р.

Рішено о термінах іспытів

В пятницю, 24. квітня/апріля, прошла пресова конференция міністра здоровля Лукаша Шумовского, міністра едукациі Дариюша Пьонтковского та нового міністра вчыня і высшого шкільництва Войцєха Мурдзека. Міністер Пьонтковскій поінформувал, што теперішні епідемічны обставины не дозваляют ученикам вернути до шкіл та одновити діяльніст такых інституций як предшколя. Рішено о дальшым ограничыню працы тых обєктів до 24. мая. Не будут тіж діяти высшы школы, занятя будут дальше орґанізуваны на дистанс. Матуральны еґзаміны зачнут ся 8. червця/юнія іспытом з польского языка і будут тырвати до 29. червця/юнія. Матуры будут лем писемны, не буде устных еґзамінів. 16. червця/юнія зачне ся тридньовый еґзамін для учеників осмой клясы. Вшыткы еґзаміны будут ведены з дотримуваньом санітарных принципів – медже інчыма обовязуючой одлеглости медже особами.

Видокова вежа в Креници зас одкрыта

Од пятниці, 24. квітня/апріля, мож уж піти на прогульку в коронах дерев. Видокова вежа в Креници єст уж доступна для одвиджаючых. При вході каждый, хто заплатил за вступ, достане на власніст єдноразовы рукавичкы і професийональну, вельоразову охоронну маску. Атракция єст доступна штоденно в годинах од 9.00 до 17.00 (послідній вхід на вежу о год. 16.00). Прогулька в коронах дерев буде можлива завдякы схоснуваню специяльных принципів безпекы звязаных з коронавірусом. Полный список обовязуючых принципів чытайте на сайті видоковой вежы в Креници.

Новый едукацийный парк в Шымбарку

В скансені в Шымбарку завершыли будову едукацийного парку. Має він быти інчый од тых знаных, понеже находит ся гейбы барже в минулым як в реальности. Едукацийный парк єст в формі сенсоричной загороды. Його гості буде ждало вельо атракций. Буде напримір великій лябіринт збудуваный з балів, з вельома дверями внутрі. Дозволит він одвиджаючым познати технікы конструкциі хоснуваны давныма столярями. Вшыткы запроєктуваны елементы навязуют до традицийных народных обєктів. Великым дептаковым колесом буде мож пустити в рух велику боденку. Одвиджаючы будут мочы самому зробити си масло, змолоти зерно на муку муку ци спрібувати печене в специяльным пеци традицийне паля. Парк одкрыют, коли лем будут зняты ограничыня звязаны з коронавірусом. Єст він частю великого медженародного проєкту Одкрыты Музеі, реалізуваного в Польщы і на Словациі. Лідером проєкту являт ся ґорлицкій Музей Дворы Карвациянів і Ґладышів.

Парк з амфітеатром в Вапенным

В Вапенным будуют парк з амфітеатром. Завершыня прац плянуване єст на конец мая. Жытелі місцевости і туристы будут мочы хоснувати інвестицию реалізувану ґміном Санкова уж на початку червця/юнія того рока. Єст уж паркінґ, амфітеар, градирня та водна каскада. Тырват будова стежок і трьох пляців забав, якы будут ся находити на тарасах. Вшытко дополнит інфраструктура – лавкы, декорацийны світла та дерева і інчы рослины.