Сумар дня на 27. липця/юлия 2021 р.

Приносиме вам сумар медияльной ґрупы ЛЕМ.фм+ на ден 27. липця/юлия 2021 р.

Музика зо штырьох континентів на Святій Горі Явір

В неділю, 1. серпня/авґуста, на Святій Горі Явір пройде пленеровый концерт пн. «Медитациі. Музика зо штырьох континентів». Зачне ся він о 19.00 годині в церкви Покровы Пресвятой Богородиці. Подія пройде в рамках 6. Медженародного Фестівалю «При Джерелах». В проґрамі концерту творы Мануеля де Фаллі, Йогана Себастияна Баха, Джорджа Ґершвіна, Астора Піяццоллі та жыдівскы і лемківскы мелодиі. Выступлят Мариюш Мончак, вызначный гушляр лемківского походжыня, та Аліция Сєйка, яка заграт на фортепіані. Орґанізаторами подіі сут Фундация Ars Activa і парохія св. Михала Архангела в Высовій, при спілпрацы з медияльном ґрупом ЛЕМ.фм+. Вступне на подію дармо.

Перервы в доставі енерґіі в ґорлицкым повіті

Tauron заповіл перервы в доставі електричной енерґіі, плянуваны на дни од 27. до 30. липця/юлия в місцевостях находячых ся на обшыри ґорлицкого повіту. Заран електрична енерґія не буде достарчана до части будинків в Вапенным, Сідлисках і Стружній-Новій Веси. В четвер, 28. липця/юлия, перервы в доставі енерґіі плянуваны сут в Ропі, а о ден, в пятницю – 29. липця/юлия, в Высовій, Бобовій і Реґєтові.

Видок медведя то рідкіст, яка повинна тішыти

Реґіональна Дирекция Охороны Середовиска в Ряшові выдала недавно комунікат, в котрым остерігат перед близком стрічом з медведьом. О потенцияльній загорозі бесідувал для Радия Ряшів Бартош Пірґа з Бєщадского Нацийонального Парку, якій занимят ся там великыма драпіжниками. За природником, видок звіряте то велика рідкіст, яка повинна нас радше втішыти. З його досвідчыня выникат, же медведі найчастійше самы одходят, кєд видят чловека, але найліпше самому помалы одыйти. Часто вандруют, зато іх чысло може быти менше, як ся здає. В Бєщадскым Нацийональным Парку єст іх ок. 15. Тото, же медведі мож часом стрітити близко людскых сідиб, єст вином полювачів, през котрых звірята звыкают до людского запаху і ідла, якого пак можут глядати коло домів. Такій припадок был однотуваный 2 рокы тому в Тисній.

Тырват колекта на печатаня першой лемківской кухарской книжкы

Припоминаме, што до кінця серпня/авґуста тр. тырват соспільна колекта на печатаня першой лемківской кухарской книжкы. Буде она поділена на 8 части, м.ін. будут «Стравы з капусты», «Молочны стравы» ци «Стравы з комперями». Разом представленых буде 70 провіреных ориґінальных рецептур, што сут оддзеркаліньом традицийной лемківской кухні. Каждый, хто хоче мати примірник книжкы, може зробити передплату в соспільній кампаніі збераня грошы на выпродукуваня книжкы на сайті zrzutka.pl і причынити ся до печатаня публикациі, глядайте колекты під назвом: Łemkowskie smaki – wydanie książki kucharskiej. За ініциятиву одповідат Стоваришыня «Руска Бурса» в Ґорлицях.