Сумар дня на 27. липця/юлия 2026 р.

Приносиме вам сумар медияльной ґрупы ЛЕМ.фм+ на ден 27. липця/юлия 2026 р.

Головный проґрам 46. Лемківской Ватры на Чужыні в Михалові

Уж в найблизшый вікенд загорит 46. Лемківска Ватра на Чужыні в Михалові. Головный проґрам зачне ся в пятницю о 18.00 год. од выступу двох Лемківскых Ансамблів Пісні і Танця: Кычеры і Ластівочкы. Пак положене буде квітя під памятником выселеных в рамках Акциі «Вісла» в 1947 р. Дальше пройде офіцияльне розпаліня Ватры. Того дня на сцені выступлят іщы Хор Зоря, Гудаци, Ре-Карпаты, Вербунк, Бурян і буде Джем Сешын. Другого дня ватры, в суботу о 15.00 год. буде одправлена вечырня в церкви св. Михала Архангела в Михалові. По тым на сцені зачне ся дітячый блок, в рамках якого запрезентуют ся ґрупы Кычерка, Ластівчата, Лем-Смыкы і Ре-Карпаты. Дальше буде блок традиций – перше выступит Лемківскій Ансамбль Пісні і Танця Ластівочка, а пак Кычера з обрядом Собіткы. В вечернім блоку заграют Капеля Само Полудне, Грайте!, Водограй і Лемкус. Водограй осдвяткує на михалівскій сцені округлый ювілей 50-літя.

Ватряне шатро бесід

В тым році орґанізатор Ватры – Стоваришыня Лемків, зас рыхтує для вас шатро бесід, в котрым будете мочы взяти участ в дискусиях на ріжны цікавы темы. В пятницю буде м.ін. стріча з творчынями Лемківской Оперы «Голос» Дарийом Кузяк і Оксаном Терефенко-Горощак, бесіда з Даміяном Новаком – єдным з авторів книжкы «Талергоф. Лаґєр інтернуваня Русинів», як і бесіда з Юрийом Стариньскым – автором книжкы «Переселили нас мусово. Листы Лемків з років 1947-1948». В суботу буде мож побесідувати з матуристами з минулых років, што здавали матуру з лемківского языка, з Оксаном Грабан-Ліхтаньском о лемківскых оповіданях, тлумачынях і вчыню лемківского онляйн, з ведучыма і членами Стоваришыня Лемків о діалоґу поколінь в орґанізациі. На конец буде дискусия посвячена Контекстуальному Словникови Лемківского Языка з участю проф. Олены Дуць-Файфер і членів словникового ансамблю. Заохочаме до участи.

Варштаты, лісовы купелі і хмаропозераня…

На Лемківскій Ватрі на Чужыні в Михалові жде вас іщы много інчых додатковых атракций. В пятницю одбудут ся примірно варштаты рыхтуваня меринді і пчолярства. В суботу рано можете зайти на ватряну гостину, а пак взяти участ в лісовых купелях. Будут і танцювальны варштаты з Юрийом Стариньскым, на котрых навчыте ся традицийной потрясаной. На вечер для охочых буде «хмаропозераня» – ватряны рандкы з участю свашок. Буде і зона для діти з вчыньом лемківской азбукы, плястичныма і танцювальныма варштатами, музикуваньом, а аж і тереновом гром. Не ватряным поли не бракне і вшелеякых спортовых змагань. Полный проґрам, як і мотузок до придбаня білетів найдете на сайтах Лемківской Ватры на Чужыні в сіти Фейсбук і на Інстаґрамі.

Свято Лосяньскых Мазярів в Мазярскій Загороді в Лоси

В найблизшу неділю 2. серпня/авґуста в Мазярскій Загороді в Лоси сімнадцетый уж раз одбуде ся Свято Лосяньскых Мазярів. На подію просят Музей Дворы Карвациянів і Ґладышів в Ґорлицях, Ґмінный Осередок Культуры в Ропі і Майстерня Карпат. В рамках подіі одбудут ся концерты, варштаты, конкурсы показы ремесла і дальшы атракциі. На концертах запрезентуют ся Капеля Древутня, Ансамбль Лада і Руты Увіты.