Сумар дня на 27. мая 2021 р.

Приносиме вам сумар медияльной ґрупы ЛЕМ.фм+ на ден 27. мая 2021 р.

ПСК веде в асистуваным списуваню

Пряшівскій Самосправный Край Словацкой Республикы надале веде асистуване списуваня жытелів – значыт при помочы рахмайстрів. Чысло списаных ся звекшыло на веце як 88%. Кінцьом марця то было кус над 82%. В пряшівскым краю ся од початку асистуваного списуваня списало скоро 50 тис. жытелів. Буде оно тырвало на Словациі до 13. червця/юнія тр. і є адресуване про каждого, хто не міг з ріжных причын зробити самоспису. В другым тыжни aсистуваного списуваня чысло списаных на Словациі звекшыло ся на 4,950,450. Покля што не знаме нич про статистикы списуваня в Польщы. Припоминаме, што в Польщы спис тырват до кінця вересня/септембра тр.

Польска Президентска Пара на Фанарі

Вчас другого дня візиты польской Президентской Пары в Турциі Вселеньскій Патріарха Варфоломій принял Анджея Дуду і Аґату Корнгаузер-Дуду в своій резиденциі на Фанарі. Перед стрічом з Патріархом Президент вєдно з женом вступили в собор св. Юрия. «Патріарха є символом і маяком для вшыткых вірных православной і східніх Церкви, тіж в нашій вітчызні, в Польщы», бесідувал А. Дуда вчас стрічы. Патріарха Варфоломій споминал на православных в Польщы. Президент Дуда навязал до актуальной політичной ситуациі на Білоруси. Польска Президентска Пара наконец вписала ся в памяткову книгу, де спомнула, што польска православна церков є активным участником соспільного жытя Польщы.

Премєра фільму «Низкій Бескід. На ратунок цивілизациі»

Заран, 28. мая, в Выжніх Пулавах одбуде ся науково-праґматична конференция під назвом «На ратунок цивілизациі». В єй рамках одбуде ся премєра фільму «Низкій Бескід. На ратунок цивілизациі». За продукцию фільму одповідат 12 ґмін з саноцкого, коросняньского і ясельского повітів, котры спілдіют разом не лем в тым проєкті. Цілю тых діянь є заохотити діти, молодіж, але тіж дорослых лишыти віртуальный світ і проводити час з природом. Фільм представлят запоряд кажду з 12 ґмін – єй туристичны цінности і історию. Очывидно в образі бесідує ся і про Лемковину і єй жытелів. Земля тота од все асоциює ся з прекрасном природом і спокійным жытьом.

Новы хоронены ареалы на русиньскій териториі

На Словaциі мали бы выникнути дальшы три хоронены ареалы. Іде о териториі в русиньскым реґіоні, конкретно Вышній ток Хотчанкы, Вышній ток Выравы і Лаборец. Пляны такы представило Міністерство Жывотного Оточыня Словацкой Республикы. Вышній ток Хотчанкы мал бы ся находити в окресі Стропків, в катастральній териториі села Дрічна. Цілковита обшыр хороненого ареалу мала бы мати 2,55 гектара. Хоронены бы мали быти гірскы водны токы. В окресі Меджелабірці в катастральній териториі села Вырава має быти выголошеный хороненый ареал Вышній ток Выравы на 19,47 гектарах. Хороненый ареал Лаборец мал бы быти в окресі Меджелабірці в катастральній териториі сел Чертіжне, Габура і Борів. Мал бы він выносити 24,96 гектарів. На тій обшыри сут ясеньово-вільховы підгірскы заплавны лісы і дальшы цінны рослины.