Сумар дня на 27. мая 2025 р.

Приносиме вам сумар медияльной ґрупы ЛЕМ.фм+ на ден 27. мая 2025 р.

Десят звідань до кандидатів на уряд президента ПР

20. мая спілведучый Спільной Комісиі Уряду та Нацийональных і Етнічных Меншын, Григорий Куприянович, звернул ся до обох кандидатів на уряд президента ПР, котры вошли до другой туры выборів, з десятьома звіданями, тыкаючыма нацийональных і етнічных меншын враз з соспільністю хоснуючом кашебскій реґіональный язык. Выстосуване писмо має як ціль сперти выборців меншыновых ґруп в свідомым выборі свого Президента. Звіданя пересланы до кандидатів тыкают ся м.ін. місця меншын в соспільстві, покликаня в Польщы інституту культуры нацийональных і етнічных меншын ци систему фінансуваня культуры меншын з публичных середків в стабільній формі, а не єднорічных дотаций (як то дотепер фунґує). В звіданях порушено темы: новелизациі уставы о меншынах в виді пошыріня прав меншын і підтриманя іх достоменности; ци кандидаты піднимают діяня на хосен меншын і ци в будучым плянуют сперати меншыны; ци кандидаты мают своє становиско што до формы заанґажуваня для будуваня в польскым соспільстві атмосферы акцептациі та своі однесіня до хоснуваня реґіональных і меншыновых языків в публичным просторі; іх опініі на тему тзв. «політикы взаімности» як і плянуваных діянь цілю реализувати медженародны зобовязаня ґварантуючы права меншынам. Остатні два звіданя тыкают ся можливой репрезентациі меншын в парляменті та респектуваня одмінной історичной памяти. Жаден з кандидатів іщы не одповіл на передставлены звіданя.

«По страні влияня – як афірмувати языкову ріжнорідніст в Польщы»

О тыжден, в просторах Варшавского Університету одбуде ся конференция «По страні влияня – як афірмувати языкову ріжнорідніст в Польщы». В проґрамі дводньовой подіі находят ся ріжного рода прелекциі і дискусиі присвячены языкам, іх ґенезі, модифікациі, модернізациі, стандаризациі ци підтриманю. Першый ден присвяченый буде минулого і сучасности підляшского языка, другій же тыкат ся норм і стандаризациі языків кашебского, шлезского, лемківского, мазурского, підляшского і языків Мексику. Про лемківскій язык оповіст др габ. Олена Дуц-Файфер в прелекциі «Языкова стандаризация – што значыт, што творит? Рефлексиі з перспективы лемківского опыту». Ціліст дополнит спектакль «Брыдкє Кача». Подія пройде 5. і 6. червця/юнія на выдилі «Artes Liberales» Варшавского Університету.

Курорт в Вапенным буде мал новы атракциі

Ґміна Санкова рыхтує ся до оголошыня конкурсу на перебудову Курортового Парку в Вапенным. Як передала війт ґміны, Малгожата Малух, ґміна має уж готовый проєкт і позволіня на перебудову. Цілю проєкту єст піднесіня туристичной атракцийности найменшого в Польщы курорту. В пляні єст утворіня місця до рекреациі і одпочынку, модернізация амфітеатру, моло і будова “тиролькы”. Буджет, якым диспонує самоуряд, то 8 млн. зл. Власти надіют ся, што модернізация закінчыт ся в протязі двох років.

Карпатска стріча про архівум др. Ауґуста Бохеньского

Карпатскє Товариство просит на найблизшу подію з циклю «Карпатскых стріч», котра пройде в четвер 29. мая. Стрічу поведе Анджей Жыґадло, артиста, консерватор і бадач деревяной штукы, а оповідал буде о Карпатскым Погірю на знимках авторства др. Ауґуста Бохеньского, як і цифровым архіві його прац. Стріча пройде в інтернетовій формі на плятформі ZOOM о 19.00 год. Трансмісию з подіі мож буде обзерати на плятформі YouTube, а награня пак буде опубликуване на портали karpaccy.pl.