Сумар дня на 27. серпня/авґуста 2024 р.

Приносиме вам сумар медияльной ґрупы ЛЕМ.фм+ на ден 27. серпня/авґуста 2024 р.

«Низкій Бескід на ровері – Загыненый світ Бойків, Лемків і Погірян»

Стоваришыня GorliceBike просит любителів роверовых прогульок до участи в райді «Низкій Бескід на ровері – Загыненый світ Бойків, Лемків і Погірян». Подія пройде в найблизшу суботу 31. серпня/авґуста. Райд зачне ся о 10.00 год. при Центрі Лыжного Спорту і Родинной Рекреациі в Кривій. Участникы мают до переіханя трасу долгости коло 50 км і 750 м перевысшыня, оцінену орґанізаторами як середньо тяжку. Біциґлисты з Кривой переіхают до Ґладышова, через Смерековец, Шквіртне, Реґетів, Ждыню до Радоцины, Чорного і назад до Ясюнкы і Кривой. Што барз важне, конечна єст скорша реґістрация участників, через інтереновый формуляр, котрый єст активный іщы лем днес до годины 23.30. Опцийональні мож ся записати в ден райду в Центрі в Кривій перед початком райду, єданк чысло місц буде ограничене. На закінчыня роверовой прогулькы при меті пройде пікнік, де буде тіж музична част. На сцені запрезентує ся лемківскій ансамбль Терочка веденый Андрийом Трохановскым і погіряньскій ансамбль Поляне.

«Туристичны Скарбы Малопольщы»- де находят ся перлины реґіону?

Зачала ся шеста едиция конкурсу «Туристичны Скарбы Малопольщы». Його цілю єст нагородити найбарже атракцийны, новаторскы і приязны для туристів місця. Голосы мож оддати аж в 6-ох катеґориях: місце з климатом, найбарже інтересуючый туристичный пут, подія, унікатова туристична атракция, сельскы климати і в гостині. Як подала Івона Ґібас з заряду воєвідства, в Малопольщы єст барз дуже перлин, котры заслугуют на выріжніня. Участ в конкурсі єст дармова, а для лавреатів сут фінансовы нагороды і участ в промоцийній кампаніі в 2025 році. Кандидатів до каждой з катеґорий мож г\зголошувати до 4. вересня/септембра тр. на інтернетовым сайті конкурсу. Пак зачне ся другій етап конкурсу – інтернетове голосуваня, котре буде тырвало до 4. жолтня/октобра.

В ґміні Команча нашли новы могылы з часів Великой Войны

Закінчыли ся археолоґічны досліджыня на бывшым церквиску в Зубеньску, в ґміні Команча. Была то уж 5. едиция досліджынь веденых Ягайлоньскым Університетом в рамках проєкту «Карпатскы епізоды Великой Войны». В неістнуючым уж селі Зубеньско дослідникы нашли м.ін. новы могылы, а беручы до увагы інчы цмонтері одкрыты в Лупкові і Воли Миховій – рахуют, што в околици може быти похованых аж і 1000 вояків, котры стратили жытя в 1915 році. Як поінформувал представник ґміны Команча, археолоґічны досліджыня не лем причыняют ся до розвитку знань о істориі реґіону, але тіж можут причынити ся до збогачыня туристичной атракцийности ґміны.

Остатні дни на выполніня анкєты про будучый проґрам трансграничной спілпрацы Interreg

Припоминаме, што іщы лем до кіня серпня/авґуста мож взяти участ в консультациях тыкаючых будучого проґраму трансграничной спілпрацы на польско-словацкым пограничы Interreg. До той поры при фінансовым спертю з проґраму вдало ся одкрыти вельо кілометрів туристичных шляків, одновити понад 400 обєктів інфраструктуры ци змодернізувати близко 200 км доріг. Консультациі ведены сут Спільным Секретариятом Проґраму, а цілю єст зобрати опініі і увагы што до будучой едициі проґраму, котра зачне ся в 2027 році. Анкєта кєрувана єст особливо до жытелів погранича, але выполнити можут ю вшыткы заінтересуваны розвитком польско-словацкого пригранича. На сайті проґраму Interreg находят ся два мотузкы, першый до анкєты зрыхтуваной для інституций, а другій – для жытелів і заінтересуваных.