Сумар дня на 27. січня/януара 2023 р.

Приносиме вам сумар медияльной ґрупы ЛЕМ.фм+ на ден 27. січня/януара 2023 р.

Дальшы проблемы з одкрытьом автобусу Крениця – Бардиів

Пряшівскій Самосправный Край має уж позволіня, жебы урухомити трансграничне автобусове получыня Крениця – Бардиів. То шанса на розвиток туристикы в Креници і цілым реґіоні. Маршалківскій Уряд Малопольского Воєвідства старал ся о такє получыня уж од 2017 р. – товды на одкрытя самосправных трансграничных получынь не дозваляли словацкы переписы. Змінило ся тото в 2019 р. В плянах Прашівского Краю нашли ся автобусовы получыня до Польщы – Бардиів-Крениця, Попрад-Закопане ци Стара Любовня-Пивнична. Курс Бардиів-Крениця мал быти одкрытый як першый, і покля ся тото не стане, не будут урухомлены дальшы. В послідніх місяцях были завершены формальности звязаны з одкрытьом леніі, такы як позволіня на хоснуваня пристанків в ґміні Крениця. На жаль, урядовый кризис на Словациі спричынил проблемы з фінансуваньом самосправ. Цілю спертя ініциятивы возникла інтернетова петиция до пряшівского жупана Міляна Маєрского, яку може підписати каждый, без огляду на місце замешканя. Представникы соспільной ініциятивы «Польща-Словация-автобусы» надіют ся, же самосправа підыйде до справы пріоритетово і получыня поведе ся одкрыти іщы перед Европейскыма Іграми, якы ся одбудут в червци/юнію тр. м.ін. в Креници.

Нова траса в сіти VeloMałopolska 

Ґорлицкій Повіт має быти долученый до сіти роверовых трас VeloMałopolska. Долучена буде траса Velo Ropa, яка поведе місцевостями ґорлицкого повіту аж до Біча. Стежка має ся зачынати в Лібушы, ідучы уж вызначеныма трасами, жебы дотерти до границі з Підкарпатьом, де ся получыт з дальшыма стежками. Можливе, же траса в другу страну получыт Біч з озером в Климківці, а дальше і з Высовом. Дале могла бы ся натурально получыти з плянуваном од долшого часу трасом Velo Biała. Первістно траса мала іти од Стружів, через Бобову і Тяжковиці до Тарнова, але на минулорічній урядовій стрічы явила ся пропозиция продолжыня стежкы до Ізб. Коли вшыткы трасы будут рішены, опрацувана буде мапа для Заряду Воєвідскых Доріг. Долучыня до сіти VeloMałopolska є барз добром новином для реґіону. Цілю проєкту є позыскати цертифікат EuroVelo, што потверджат найвысшый стандард роверовых стежок.

Альбом про лемківскы церкви номінуваный до літературного конкурсу

Альбом Катажыны Бєляк і Целіны Цемпы пн. «Шляком церкви в Ґміні Лабова», печатаный влони Товариством Любителів Лабівской Землі, был зголошеный до конкурсу о Нагороду ім. о. проф. Болеслава Кумора 2022 в катеґориі «Книжка о Сандеччыні». Як мож чытати в поясніню, альбом пропаґує культурову дідовизну ґміны – презентує забытковы церкви в Камяній, Матієвій, Лабовій, Лоси і Розтоці Великій. Храмы вказуют красу церковной архітектуры і прикликуют давну Лемковину, на обшыри якой лежали актуальны терены ґміны. Презентуваны церкви сут вписаны на листу памятників і обняты консерваторском опіком. Актуально служат як костелы, перше были то православны і грекокатолицкы святыні.

Закрыты шлякы в МНП

До одкликаня закрыты сут шлякы і природничы стежкы в Маґурскым Нацийональным Парку. Причыном для такого рішыня были тяжкы обставины для туристикы, поламаны дерева і вісяче голузя. Як подали природникы, з таком скальом знищынь туристичной інфраструктуры стрічают ся першый раз. Стежкы остают закрыты з огляду на загорожыня для осіб будучых на шляках.