Сумар дня на 27. жолтня/октобра 2022 р.

Приносиме вам сумар медияльной ґрупы ЛЕМ.фм+ на ден 27. жолтня/октобра 2022 р.

Лемкы в Лемковині Ультра Тейль

В минулу суботу прошла ІХ едиция змагань в гірскым біганю – Лемковина Ультра Трейль. Серед участників акциі нашла ся міцна ґрупа Лемків, якы міряли своі силы на дистансах 30, 48, 70 і 150 км. В тым році нихто з нашых репрезентантів не статрувал на 100 км. Найбільше Лемків выстартувало на 30 км – аж 7 осіб. На 48 км – єден, на 70 – двох Лемків і на 150 – єден репрезентант. Хвиля в суботній ден была прекрасна, лем на вечер зачало ляти. В тым році орґанізаторы зрыхтували специяльну катеґорию під наголовком «Лемко» – для репрезентантів той етнічной ґрупы, котры найскорше перелетіли даный дистанс. На 30 км перемогли Юлия Цюрик-Косовска і Севериян Косовскій, на 48 Йоан Пупчык, а на 70 км Роман Цюрик. Окрем того самы Лемкы зрыхтували участникам вчас офіцияльного переданя нагорід квіз тыкаючый знаня о Лемковині. Тоты, якы знали правильны одповіди, отримували специяльні зрыхтуваны деревяны медалі, зроблены з фраґментів ґонту зо старой лемківской хыжы з Вірхні – Ґладышова. На найдолшым дистансі 150 км змагал ся наш ультрабігач – Кристиян Трохановскій. В сумі в тогорічній едициі выстартувало близко 1500 осіб.

Сарепта з дофінансуваньом на ремонт осередка в Новици

Як інформує ґорлицкій повіт, на основі підписаного 24. жолтня/октобра договору, в найблизшым часі зачне ся ремонт будинків Братства Грекокатолицкой Молодежы Сарепта в Новици. Сарепта модернізацию трьох обєктів проведе завдякы спертю Фундациі Leroy Merlin. При підписаню умовы участный был тіж репрезентант ґорлицкого староства. Договор был підсаный медже ведучым Братства о. Йоаном Піпком а презесом Фундациі Leroy Merlin. В будинках буде проведеный ремонт елевациі, центрального огріваня і монтаж помп тепла. Підписана умова тыкакт квоты 584 603,85 зл. По завершыню прац в сідибі Сарепты в Новици буде могло замешкати 50 біженців з Украіны. Конец ремонту передвиджено на квітен/апріль будучого рока. Братство Сарепта, окрем новичаньского, має іщы осередок в Команчы.

Зачала ся модернізация церкви в Брунарах

Як інформує Воєвідскій Уряд Охороны Забытків в Кракові – Делеґатура в Новым Санчы, в тых днях зачали ся ремонтовы і консерваторскы працы памятковой церкви св. Михала в Брунарах. То єден з найціннійшых обєктів на обшыри діянь делеґатуры, якій є на списку UNESCO. Модернізацийны роботы будут попереджены архітектонічныма баданями – буде зробленый інвентаризацийный сканінґ цілой церкви. Вчас одкрытя бані на вежы вказали ся ориґінальны фраґменты старой довыселенчой поліхроміі. Фраґменты тоты будут досліджены лябораторийні цілю окрислити склад субстанциі. Як подає новосандецка делеґатура, уж тоты вступны результаты заповідают одкрытя цікавых і дотля незнаных елементів і деталів в тій пямтковій лемківскій церкви.

Любіньска церков просит на Свято Копальників

Православна Парохія в Любіні рыхтує ся до тогорічного Свята Копальників. З той нагоды парохія вєдно з парохом і капеляном копальників – о. Богданом Репелом, просят вшыткых копальників і вірных до спільной молитвы, яка одбуде ся 4. грудня/децембра в православній церкви св. Тройці в Любіні. Буде одслужена Божеска Літургія, яку першый раз на тот праздник в Любіні очелит владыка Юрий, архієпископ вроцлавско-щеціньскій, православный ординарий Польского Войска. В Любіні і околицях жыє вельох лемківскых копальників, якы наштоден роблят в ріжных майнах KGHM. Любіньска парохія од парох років активно пропаґує свято копальників.