Сумар дня на 28. червця/юнія 2021 р.

Приносиме вам сумар медияльной ґрупы ЛЕМ.фм+ на ден 28. червця/юнія 2021 р.

Унійна перспектива 2021-2027

Малопольскє воєвідство отримат понад 2,5 млд евро унійных середків в рамках новой унійной перспективы на рокы 2021-2027. Як бесідує маршалок малопольского воєвідства Вітольд Козловскій, скорше плянуване было 1,5 млд евро, але квоту повело ся збільшыти. Не знатя, іщы на якы конкретны задачы будут переданы середкы. Як подал маршалок Козловскій, в рамках проґраму Східня Польща самоуряд малопольского воєвідства буде реализувал спільны проєкты з підкарпатскым воєвідством, напримір проєкт тыкаючый будовы гірскых колиб, модернізациі пішых шляків, інфраструктуры до одпочываня, ознакуваня. Маршалок выразил надію, што в найблизшым часі поведе ся позыскати вшыткого аж і 4 млд евро.

Продолжена консервация церкви в Перегримці

І того рока продолжаны будут роботы при консервациі православной деревяной церкви св. Михала Архістратига в Перегримці. Як подає парох о. Роман Дубец, од парунацетьох років місцеве лемківскє соспільство старат ся о проведіня комплексовых ремонтовых прац при святыни. Што рока, завдякы заанґажуваню вельох осіб і інституций, консервациі піддаваны сут части выпосажыня і розпису. В тым році повело ся позыскати од Уряду Ґміны в Осєку Ясельскым і Підкарпатского Уряду Охороны Забытків дотациі на завершыня консервациі престола в высокости 44 тис. злотых, што покрыє 60% квоты плянуваных до реализациі робіт. До полного буджету бракує іщы 20 тис. злотых. Даткы на ремонт святыні мож передати м.ін. через інтернетову збірку находячу ся на сайті zrzutka.pl. Кєд же ся не поведе назберати бракуючу квоту, дотациі з Уряду треба буде звернути. Тогорічны роботы то предовшыткым естетичны діяня, якы позволят зложыти престіл на властивым місци. Поєдны елементы будут золочены і кольористично зцілены.

Презентация творів по русиньскы в Ужгороді

В суботу 26. червця/юніа тр. в ужгородскым Центрі культур нацийональных меншын Закарпатя одбыла ся презентация творів писателів і поетів области, котры пишут в русиньскым языку. Орґанізатором подіі был Микола Бобинец, голова Крайового общества підкарпатскых Русинів і єдночасно член Світовой Рады Русинів за Украіну. Своі збіркы презентували Володимір Рошко, Іван Ситар, ци Александер Хуст (Купар). Увага участных звернула ся і на переклады Івана Ситара вершів вызначных поетів до русиньского языка. О потребі роботы науковців, дослідників, літератів, жебы досліджати русиньскы діалекты Підкарпатя і зробити кодифікацию підкарпатского вариянту русиньского языка, споминал Александер Хуст. Участны подіі могли і познати выставу творів пишучых по русиньскы авторів. На подіі гостил і Олександр Лях, представник Одділіня культуры, наций і реліґій Закарпатской областной державной адміністрациі.

Ґрантовый проґрам для локальных соспільств «Моє місце на Земли»

Як поінформувал на своім офіцийным інтернетовым сайті Ґорлицкій Повіт, Фундация Орлен зачала набір до четвертой едициі ґрантового проґраму для локальных соспільств «Моє місце на Земли». До 29. липця/юлия тр. позаурядовы орґанізациі і самоурядовы інституциі з цілой Польщы можут складати внескы о дофінансуваня ідей на діяня в своіх малых отчызнах. Буджет проґраму то 2 млн злотых, а шансу на ґрант має в тым році 200 підметів. Ґранты в высокости од 5 до 20 тис. злотых будут признаны на реализацию проєктів звязаных з еколоґійом, спортом, безпеком, культуром, охороном звірят ци зрівноваженым розвитком. Старати ся о фінансову підпору можут не лем позаурядовы орґанізациі, але і культурны інституциі, школы, предшколя, сельскы кружкы ґаздынь, ци парохіі. Найвекшы шансы достати ся до проґраму будут мати проєкты зорієнтуваны на локальны потребы і тоты, котры будут інтеґрувати жытелів і анґажувати до спілпрацы ріжны підметы.