Приносиме вам сумар медияльной ґрупы ЛЕМ.фм+ на ден 27. червця/юнія 2022 р.
Канцелярия Председы Рады Міністрів одповіла на писмо спілведучого СКУтНіЕМ репрезентуючого меншыны
Як поінформувала меншынова сторона Спільной Комісиі Уряду та Нацийональных і Етнічных Меншын, пришла одповід з Канцеляриі Председы Рады Міністрів на писмо спілведучого Комісиі репрезентуючого меншыны до Премєрa Міністрів Матеуша Моравєцкого о скєруваня внеску до Рады Міністрів о одкликаня розпоряджынь Міністра Едукациі і Наукы з 4. і 10. лютого/фебруара тр., якы дискримінуют польскых громадян, што сут учениками нележачыма до німецкой меншыны. В одповіди арґументуют, же ініциюваня процедуры уреґулюваной в 149 артикулі уступ 2 речыня 2 Конституциі Польской Республикы, якій гварит «Рада Міністрів, на внесок Председы Рады Міністрів, може одкликати розпоряджыня або заряджыня міністра», єст в представленій ситуациі передвчасне. Єдным з арґументів єст, же в справі згідности переписів права, выдаваных центральныма державныма орґанами з Конституцийом, ратифікуваныма медженародовыма догварінями і трактатами, властивый єст Конституцийный Трибунал. Оба писма мож чытати на фейсбуковым сайті меншыновой стороны Комісиі.
Зачал ся цикль промуючый польскє выданя книжкы проф. Павла Роберта Маґочія
Уж днес перша з циклю авторкых стріч з проф. Павлом Робертом Маґочійом, якы тыкают новой на польскым выдавничым рынку публикациі пн. «Pod osłoną gór. Dzieje Rusi Karpackiej i Karpatorusinów» в тлумачыню Марка Круля. Польскоязычна версия книжкы є третьом, при ориґіналі по анґлицкы і тлумачыню на словацкій язык. Печатана є выдавництвом Лібра PL. Днешня стріча заплянувана на 18.00 год. в Державным Етноґрафічным Музею в Варшаві. Стрічу ведут Роберт Зыдель, директор Музею і др габ. Томаш Стрыєк. Наступна стріча пройде заран о год. 17.30 в Польскій Академіі Знань в Кракові, а вести ю будут др. габ. Олена Дуць-Файфер і др. габ Анджей Зємба. Дальшы стрічы пройдут 29. червця/юнія в Музею Дворы Карвациянів і Ґладышів в Ґорлицях, 30. в Історичным Музею в Саноку і наконец 3. липця/юлия в Музею Лемківской Культуры в Зындрановій.
Вакацийны Стрічы в Маґурскым Нацийональным Парку
О пару дни в Маґурскым Нацийональным Парку зачнут ся вакацийны стрічы. Першы прироничы варштаты для діти од 6 до 12 рока жытя одбудут ся уж в тоту середу о 10.00 год. в Едукацийно-Музейным Осередку Маґурского Нацийонального Музею в Крампній. Природничы варштаты для діти будут проходити в Осередку кажду вакацийну середу о 10.00 год і будут тырвати од 1 до 3 годин. Обовязуют скоршы записы. Участ дармо. Для дорослых і родин працівникы зрыхтували цикль штотыжньовых прогульок по Парку. Перша одбуде ся в тоту пятницю 1. липця/юлия. Старт двогодинной прогулькы о 10.00 год. при церквиску на стежці Свіржова Руска. Додатково, парковый едукатор буде присутный од 9.00 до 15.00 год. на стежці Свіржова Руска – Майдан – Маґура. Участ в прогульці єст безплатна, але конечно треба купити білет вступу до Парку.
ПоШлякы в Татряньскым Нацийональным Парку
Вакацийны едукацийны занятя зрыхтували і другы Нацийональны Паркы. В найблизшу пятницю, 1. липця/юлия, в Татряньскым Нацийональным Парку рушают ПоШлякы, стрічы з парковыма провідниками і едукаторами. Едукацийны прелекциі будут проходити каждый ден, о каждій цілій годині од 10.00 до 14.00 год. в шестьох пунктах Парку. Додатково од 2. липця/юлия в віторкы і суботы орґанізуваны будут вечерні тематичны прелекциі при огниску.