Сумар дня на 28. червця/юнія 2023 р.

Приносиме вам сумар медияльной ґрупы ЛЕМ.фм+ на ден 28. червця/юнія 2023 р.

Петро Медвідь в Раді Музею Словацкого Нацийонального Музею

З дньом 26. червця/юнія тр. Петро Медвідь вошол до Музейной Рады Словацкого Нацийонального Музею. Декрет члена Рады принял в минулый понедільок в Братиславі. Петро Медвідь то русиньскій журналиста, діяч і функцийный – є м.ін. порадником дс. русиньской меншыны президенткы Словацкой Республикы Зузаны Чапутовой, а тіж членом Комісиі про Нацийональны і Етнічны Меншыны Рады Влады Словацкой Республикы. Словацкій Нацийональный Музей є передовом державном інституцийом в обшыри музейной діяльности в Словацкій Республиці, занимат ся зберіганьом памяток, веде науково-бадавчу та культурно-освітову діяльніст, громадит, документує, професийні перетворює артефакты словацкой природы і соспільства, славацкого народу, а так само і етнічных соспільности. В рамках діяльности веде 18 окремых выспециялизуваных музеів, м.ін. історичный ци археолоґічный музеі в Братиславі, Спишскій Музей в Левочы ци Музей Украіньской Культуры в Свиднику або Музей Русиньской Культуры в Пряшові. При інституциі выникнула Рада про Нацийональны Меншыны Словацкого Нацийонального Музею, в якій засідают представникы вшыткых меншын, котры мают своє одділіня під СНМ, додатковым членом є полномічный влады про нацийональны меншыны Ласло Буковскій, з ініциятивы котрого покликано раду.

«Червена ружа» і «Червене пупча» в Рускым Керестурі

В найблизшый вікнед в Рускым Керестурі на Бачваньскій Руси пройде 62. Фестіваль Русиньской Культуры «Червена ружа». В першый ден презентувати будут композициі для діти в рамках части «Червене пупча», пак старшы школяре запрезентуют новы аранжациі знаных співанок – выступит новооснованый банд Горуци кромпльочки. Од 21.00 год. при акомпаніяменті Фестівальовой Оркєестры презентувати ся будут в забавных композициях дальшы співакы і вокалисты, а од 22.00 год. в рамках вечера «Юлиян Рамач Чамо» дванадцет родинных дуетів выступит зо співанками в народным духу. В другій ден фестівалю пройде презентация місцевых фольклорных ансамблів, як гіст выступит колектив з Гуменного. Орґанізатором фестівалю єст Дом Культуры Рускій Керестур.

Лемківскій Триптих в Бортным

8. липця/юлия пройде вернісаж выставы пн. Лемківскій Триптих. Буде то выстава фотоґрафіі авторства Яцка Косібы, ґорлицкого фотоґрафіка. Презентувана буде до кінця серпня/авґуста в просторах грекокатолицкой церкви св. Космы і Даміана в Бортным, яка тепер є музейным обєктом Музею Дворы Карвациянів і Ґладышів в Ґорлицях. Яцек Косіба з фотоґрафуваньом звязаный є од близко 70 років. Управніня інструктора фотоґрафіі отримал од Міністра Культуры і Штукы в 1978 році. Показал парунадцет темовых індивідуальных выстав та пару ґруповых. Отримувал выріжніня і нагороды в реґіональных і загальнопольскых конкурсах. Фотоґрафує бывше і теперішнє ґорлицкой землі, в тым вельо звязаного з Лемками і Лемковином.

Молитва в третю річницю смерти бл. п. Богдана Ґамбаля

На суботу 1. липця/юлия запрашаме на спільну молитву спомнути памят нашого приятеля, а основателя радия ЛЕМ.фм – Богдана Ґамбаля. Служба правлена буде о 11.00 год. в каплици на Св. Горі Явір. Служыти буде о. Ярослав Чухта. То уж три рокы одколи неє медже нами чловека, без котрого не было бы штоденного нашого жывого слова і нашой музикы. Богдан Ґамбаль был вельолітнім діячом, активістом, політиком, ведучым Стоваришыня «Руска Бурса» в Ґорлицях – реактиватором орґанізациі та спілосновательом Стоваришыня Лемків. Будме в тот ден разом.