Сумар дня на 28. квітня/апріля 2020 р.

Приносиме вам сумар медияльной ґрупы ЛЕМ.фм+ на ден 28. квітня/апріля 2020 р.

По Крениці на роверах

Сім новых трас для гірского колярства в Креници буде одданых для хоснуваня уж на початку мая. В остатніх роках штораз більшом популярністю тішат ся роверовы пути, котры барз міцно притігают туристів. Не чудне, же в тым році то в тоту страну пішли власти Крениці і на початку мая одкрыют близко 100 км. новых трас. В рамках проєкту находит ся сім тематичных трас, котры названы сут як джерела мінеральной воды, находячы ся в Креници, і означены ріжныма кольорами. Напримір найдолша траса о долгости 22 км. названа єст Зубер і означена на зелено, а найкоротша Солотвинка, котра не мат ани 5 км., означена єст кольором фіялковым. Вшыткы пути зачынают ся на дептаку, а пак ведены сут в околицях Парковой Горы, Креницкой Яворины, ци єдной з найпопулярнійшых атракций міста – Стежкы в Коронах Дерев. Трасы будут одкрыты цілый рік, в літнім періоді як роверовы і спацеровы, а в зимовым до бігів на нартах. В проєкті подумано тіж о любителях дакус барже екстремальных спортів, для них зрыхтувано три специяльны трасы Ендуро. Тоты, як раз, свій початок будут мати на вершку Парковой Горы, а іх долгіст не перекрочыт 1300 метрів.

 Ціла Польща садит лісы, #sadziMY

Скінчыла ся наступна едиция акциі #sadziMY. То єдна з акций основаных в рамках Медженародного Рока Здоровля Рослин в Польщы. Во вшыткых 430 надлісництвах Державных Лісів лісничы роздавали дармовы садженкы деревок з інформацийом, як і де треба іх посадити. Ціла акция проходила з ініциятивы Президента Польской Республикы Анджея Дуды. Річні садженых єст 500 млн. дерев, а лісы занимают уж такой третину териториі Польщы. Того рока лісы сут загорожены іщы барже як в попередніх, вшытко зо взгладу на сушу. Уж тепер пожарів лісів єст більше на тот момент як минулого рока, а в цілій державі выступує найвысшый рівен пожарового ризика. З подібном ситуацийом борют ся тіж Словакы. Словацкє Міністерство Середовиска разом з Нацийональным Татряньскым Парком заінвестували близко 100 млн. зл в систем лісных моніторінґовых камер цілю скорше выкрывати пожары. Вшытко, жебы не повторила ся пожарова ситуация подібна до років 2013 ци 2017.

Рекордово низкій рівен воды в ріках Дунаєц і Камениця

Центр Кризисового Заряджаня в Новым Санчы з Кжыштофом Сетляком на челі інформує, же ситуация іщы не єст найгірша, але ріжниця рівня воды єст уж барз міцна. На теперішню хвилю стан Дунайця то 76 цм. а Камениці 77 цм, такых даных не было уж од років. До такого стану довела не лем тепла зима ци брак снігу, але тіж высокы температуры і брак дощів на яр. Кжыштоф Сетляк зазначат тіж, же кєд дистрибуцию воды для жытелів Нового Санча то актуально неє жадных проблемів і радше такых не буде. Апелює ся же ощаджати і з головом сохувати воду на обшыри цілой Польщы.

Вертают курсы автобусовой комунікациі

Од понеділька з Ґорлиц буде мож доіхати до Кракова ци Ряшова. Зо взгладу на епідемію коронавіруса, многє чысло фірм барз міцно підупало, а по ввведіню рестрикций, тыкаючых ся переміщаня, транспортовы фірмы мусіли моментально завісити діяльніст. Тепер помалы вертают на рынок. Як перша вернула фірма NOWEX з трасом Ґорлиці-Ряшів-Ґорлиці. Од вчера з Ґорлиц мож тіж доіхати і вернути з Кракова разом з фірмом Europol Połeć, а на своі локальны трасы вернул Libropol.