Сумар дня на 28. липця/юлия 2023 р.

Приносиме вам сумар медияльной ґрупы ЛЕМ.фм+ на ден 28. липця/юлия 2023 р.

Талергофскій Ден Памяти

Заран, 29. липця/юлия, Лемко Союз в ЗША і Карпаторусиньскій Америцкій Центр Lemko Hall орґанізуют Талергофскій Ден Памяти. Подія одбуде ся в Стемфорд в ЗША в місцевій православній церкви. Упамятніня зачнут ся од молитвы о 11.00 год. Панахіду одслужыт лемківскій священник, о. Владимір Горощак. Пак одбуде ся дискусия до темы і лянч. Подія посвячена буде не лем жертам талергофского лаґру з Лемковины, але і взяненым і страдавшым в Центральным Лаґрі Працы в Явожні в наслідстві акциі «Вісла».

В Креници одбуде ся історична спортова подія

Крениця рыхтує ся до дальшой спортовой подіі на світовым рівни. На Креницкій Яворині мают в будучым році проходити престіжны змаганя Погару Світа в Сновборді. Історична подія одбуде ся 24. і 25. лютого/фебруара 2024 р., на найліпше в Польщы зрыхтуваных трасах. Тепер лыжно-сновбордовый осередок в Креници візитували представникы Медженародной Лыжной Федерациі (FIS), де ся стрітили з представниками Польского Лыжного Звязку (PZN) і Польскых Кабельных Желізниц (PKL). Як подал Уве Баєр, Директор Погару Світа FIS в Сновборді, підчас інспекциі в Креници выбрали місце, де в найблизшым сезоні одбудут ся історичны, першы змаганя Погару Світа в альпейскым сновборді. Як ствердил, «Крениця має превеликій потенциял і уж тепер диспонує одповідніма схылами і добром інфраструктуром желізниці і вытягів». Позитивно оцінил і систем насніжаня. Як подал PZN, лыжный осередок на креницкій Яворині має великій потенциял до створіня державной тренінґовой базы для занмаючых ся сновбордом і альпейскыма лыжниками. Завдякы орґанізациі престіжных спортовых змагянь Крениця зас має можливіст зміцнити свій бренд – влинут они на звекшыня туристичного руху, а завдякы світовым телевізийным трансмісиям на шыршу розпознавальніст.

Ярмак Ікон в Саноку

О тыжден, в вікенд 5.-6. серпня/авґуста в Саноку одбуде ся ювілейна, двадцета едиция Ярмаку Ікон. На саноцкым рынку запрезентує ся понад 120 выставців – народных артистів і ремісників з цілой Польщы. При нагоді ярмаку окрем ікон буде мож сой придбати ремесельны, малярскы ци ткацкы выробы та реґіональне ідло. Ярмакови буде товаришыла і жыва музика. В першый ден подіі, в суботу 5. серпня о год. 17.30 одбуде ся концерт в православній церкви св. Тройці в Саноку – заспіват ансамбль Відимо. В неділю музичны выступы будут продолжати на замковым дворі. Окрем того в проґрамі сут варштаты, м.ін. артистичны, ремесельны, кулінарны, і показы ковальства. В суботу од 15.00 год. в Історичым Музею будут проходити два выклады – Катажыны Вінницкой «Ікона XV-XIX столітя, зо збіркы Історичного Музею в Санок» та Ярослава Ґемзы «Ікона перемышльской єпархіі вчера і днес».

Лемківскы подіі в тот вікенд

А уж од заране, в суботу 29. і неділю 30. липця/юлия, буде в Музею Лемківской Культуры в Зындрановій проходила подія «Од Русаль до Яна». В проґрамі м.ін. звиджаня музею, ріжного рода прелекциі, показы народного ремесла, промоция публикациі «Павел Стефановскій. Выбраны вершы» і концерты ансамблів з Польщы і Словациі. Зато в Бортным, в музейній церкви, буде мож заран од 16.00 год. слухати концерту памяти Димитрия Бортнянского пн. «Тобі співаме», на якій просит Музей Дворы Карвациянів і Ґладышів. Подія пройде в рамках VIII едициі Медженародного Фестівалю «При Джерелах».