Сумар дня на 28. листопада/новембра 2023 р.

Приносиме вам сумар медияльной ґрупы ЛЕМ.фм+ на ден 28. листопада/новембра 2023 р.

«Маяк православя. 100 років од выникнутя ладомирского монастыря як продолжувателя православного монащества на Словациі»

В остатнім часі вказала ся нова публикация в словацкым язику «Маяк православя. 100 років од выникнутя ладомирского монастыря як продолжувателя православного монащества на Словациі (рр. 1923- 2023)». Автором книжкы єст Петро Сорока, православный духовный в Осадным. Посвячена она єст православному Монастырьови преподобного Іова Почаівского, котрый был важным осередком в часі обновы православя на Словациі. Автор описує історию монастыря, його діі ци персоны особливо з ним звязаны, як і ведену монахами друкарню, разом з печатаныма публикациями. Ціліст дополняют фотоґрафіі і ілюстрациі. Сам автор підкрислят, што його книжка має вказати значыня православных монастырів, ожывити історию і особливо вказати літературу, хоснувану монахами до шыріня православя. Додатково з нагоды 100. річниці выникнутя монастыря в Ладомировій православна Церков заплянувала пару подій до споминаня діла монастыря. 11. грудня/децембра в Римі пройде наукова конференция посвячена монастырьови, а пару дни пізнійше 15. грудня/децембра в Пряшові одбуде ся прелекция і выстава пн. «Од Ладомировой до Джорданвіллу». Більше про нову публикацию Петра Сорокы можете чытати на нашым сайті.

Во Львові модернізуют лемківску церков

В Музею Будівництва ім. Климентия Шептицкого во Львові тырват реновация двох важных експонатів – реплікы лемківской церкви і найбільшой стодолы з Буковины. Модернізациі підняли ся працівникы музею, а консервация ведена єст з середків власных інституциі. Церков св. Владиміра і Ольгы то репліка лемківской святыні з Котани, котра того рока вымагала пильной модернізациі. Остатня част робіт заплянуваных при церкви зачала ся осіню і тыкат выміны даху. Як підкрислил директор музею, то особливо тяжка задача, бо покрытя церкви має дуже декорацийных заламань або закінчынь. Церков побудувано в 1992 році з датків Лемків з ЗША і Канады та лемківской спільноты во Львові. Другій експонат то стодола з Буковины, де подібні треба было конечно провести модернізацию разом з выміном даху.

Наступны утрудніня в Польковицях

В четвер 30. листопада/новембра зачне ся модернізация желізницьового переізду при ул. Фабричній в Польковицях. На час робіт переізд буде закрытый і обовзувала буде тымчасова зміна орґанізациі руху потягів. З утруднінями, окрем пасажерів, мусят ся тіж рахувати кєровці, котрых траса веде через переізд. На час модернізациі рішено ввести окрему дорогу для авт, котра веде через ул. Хоцяновску і ДВ331. Просит ся быти особливо осторожным в місци, де ведеы будут будовляны роботы. Направа переізду єст конечна, додатково находит ся в реализуваным першым етапі модернізациі желізницьовой леніі но 971 і 971а медже Любіном а Польковицями. Пляново утрудніня будут тырвати до 2. грудня/децембра.

Фестіваль Знаня в Ожынній – про природу і лемківску культуру

Осередок Еколоґічной Едукациі в Ожынній просит діти і молодіж до участи в Фестівали Знаня. Подія поділена єст на дві части. Перша пройде 2. і 3. грудня/децембра і направлена єст на діти в віку од 7 до 12 років. Через вікенд діти будут мочы взяти участ в природничых і фотоґрафічных варштатах, будут мати нагоду навчыти ся печы хліб ци робити натуральны косметикы. Друга част пройде 9. грудня/децембра – до участи прошена єст молодіж выже 12 рока жытя. В пляні фестівалю находят ся тереновы варштаты зо словацкым языком і кулінарно-історичны варштаты о істориі, традициях і кухни Лемків. Обовязуют записы, а більше дрібниц найдете на офіцияльным сайті ОЕЕ в Ожынній.