Сумар дня на 28. лютого/фебруара 2024 р.

Приносиме вам сумар медияльной ґрупы ЛЕМ.фм+ на ден 28. лютого/фебруара 2024 р.

Буде Лемківско-Погіряньскій Великодный Ярмак

Знана є уж дата традицийного Лемківско-Погіряньского Великоднього Ярмаку в Мазярскій Загороді в Лоси. Локальна святочна торговиця пройде в неділю 17. марця. В проґрамі подіі не лем кєрмеш, але і варштаты выробів ручной роботы, великодні забавы, в тым культове «полюваня на яйця» – до зобраня буде 800 яєц – участ в конкурсі для діти в віку до 10 років. Неодолга явит ся дрібницьовый проґрам подіі.

Контролювали інвестициі в ґорлицкым шпытали

Члены Комісиі Інвестициі і Охороны Середовиска Ґорлицкого Повіту, котрій председує Кжыштоф Фльондро, візитували Специялистичный Шпыталь в Ґорлицях. Цію выіздового засіданя были найважнійшы інвестициі Шпыталя, што перевели в 2023 році та тоты реализуваны тепер. Літом минулого рока переведена была модернізация Одділу Загальной та Онколоґічной Хірурґіі , а в січни/януарі тр. зачато комплекцосый ремонт вєдно з модернізацийом двох інчых одділів: інтерністично-ендокринолоґічного та кардіолоґічного. Концер робіт плянуют на конец мая тр. Кошт того ремонту то близко 2 лмн 900 тис. зл.

В курорті Рыманів затриманя

Івона О., бывша членкыня Трибуналу Стану є підозрена м.ін. о принятя маєтковой корысти і привласніня маєтку курорту Рыманів. Бывшу презеску спілкы Курорт Рыманів функцийонеры Центрального Антикорупцийного Бюра затримали 21. лютого/фебруара. Серед зашрамінь є тіж нагваряня свідків до складаня фальшывых зознань. В звязку з тым, же была членкыньом Трибуналу Стану (номінуваном партийом Право і Справедливіст), прокуратор не міг представити єй зашмарінь, аж выгасне каденция. Прокуратура з Катовиц веде досліджыня звязане з неправильностями в курорті Рыманів уж од 2021 рока. Івона О. курорт вела од 2014 рока. Коли в серпни/авґусті 2022 рока вказало ся, што ведене єст досліджыня в тій справі Івона О. зложыла резиґнацию з презесуваня курортом. В тым самым часі, тіж в звязку з неправильностями в курорті, прокуратура представила зашмаріня бывшому директорови бюра заряду курорту Павлови К. та бывшій книговій курорту.

В Любіні стріча для творців

Заран о 17.00 год. в Ґалериі Палацик в Любіні продйе стріча, на котру прошены сут вшыткы особы, котры занимают ся артистичном діяльністю, а николи, або в малій ступени, не вказували своіх робіт. Історичный Музей в Любіні веде акцию «Креативны – промоциі творчых постав», которой цілю є м.ін. навязати спілпрацу і выпромувати локальных артистів і іх творчіст. В рамках проєтку «Креативны – промоциі творчых постав» будут ведены стрічы заініциюваны уж і минулого рока, то м.ін. авторскы і едукаицйны стрічы, варштаты, выклады. Окрем індивідуальных стріч плянуваны сут тіж діяня, што будут інтеґрувати місцевых творців візуальных штук.

А в Польковицях выстава

Зас до кінця марця в Центрі Культуры в Польковицях мож обзерати выставу артистів звязаных з працовньом «Абакарт», як раз – з Любіна. «Зимовы істориі» то наголовок выставы, на котрій презенутваный є цикль образів намалюваных з інспірациі творчістю знаменитых польскых артистів, як напр. Станіслав І. Віткєвич ци Юлиян Фалат. Образы вказуют головні красу натуры, краєвиды Карпат. Образы стали ся інспірацийом для написаня вершів, котрых авторком є Йоанна Коловска, а під оком котрой малювали участникы любіньской працовни.