Сумар дня на 28. серпня/авґуста 2019 р.

Приносиме Вам сумар медияльной ґрупы ЛЕМ.фм на ден 27. серпня/авґуста 2019 р.

Кычера з дальшыма успіхами

Закінчыл ся 51. Медженародный Фестіваль Фольклору Гірскых Земель в Закопаным, котрый для ансамблю пісні і танця Кычера принюс вельо успіхів. Професийне медженародне жырі признало Кычері Бронзову Цюпаґу в єдній з трьох конкурсовых катеґорий, а то в катеґориі ансамблів презентуючых фольклор в артистчино опрацуваній формі. Першого місця в тій катеґориі не признали. Попри головным конкурсі проходил і плебісцит на Найкрасшу Ґуральку фестівалю і Найшварнійшого Ґураля. Голосами публикы Ольга Козубска з Кычеры заняла третє місце, подібні як спілчлен ансамблю – Михал Біщак. Фестіваль в Закопаным проходил од 16. до 24. серпня/авґуста. Через вісем днів мож было обзерати выступы ансамлбів з цілого світа – м.ін. з Болгариі, Македоніі, Туриці ци Непалю. Почестный патронат над фестівальом мал президент Польщы Анджей Дуда.

Послідній переізд потягом з Попраду до Мушыны

Разом з кінцьом вакаций кінчат ся курсы желізницьового получыня Мушына-Попрад. Вакацийный потяг іздил лем в вікенды, але вшыткого перевюз більше як 4 тис. пасажерів. Получыня тішыло ся великом популярністю, вернуло до розкладу по 9 роках стараня о курсы на тій трасі. Артур Круліковскій, працівник уряду міста і ґміны Мушына, єдна з осіб, котра выстарала ся о приверніня потягу, повіл, што получыня певністю верне за рік. Хоче тіж, жебы разом з Малопольскыма Желізницьовыма Леніями та Словацком Желізницьом поправити получыня і выстарати ся о низшы ціны для емеритів. Вакацийный потяг в першу трасу рушыл 29. червця/юнія, курсувал каждый вікенд вакаций. Послідні переізды пройдут в найблизшу суботу і неділю. З Попраду потяг призіджат до Мушыны двакратно, рано і пополидни, час переізду то 1:50 мин. Кошт – 5 евро. На трасі находит ся єдиный чынный в Малопольщы желізницьовый граничный перехід в Плавчы. Окрем того вакацийного получыня не ідут тамадиль ниякы пасажерскы склады. Давнійше том трасом мож было доіхати прямыма потягами до Будапешту, Букарешту, аж і до Варны і Софіі.

Котра орґанізация є найліпша?

Самоуряд Малопольского Воєвідства оголосил конкурс на нагороду Маршалка Малопольского Воєвідства для найліпшых позаурядовых орґанізаций – Кришталы Соли. Набір тырват до 30. вересня/септембра. Власти Малопольщы хотят доцінити позаурядовы орґанізациі з реґіону, котры од років доказуют, што робота для інчых мат сенс і што такы орґанізациі ініциюют соспільны зміны, спілпрацуют з жытелями на хосен загалу, реалізуючы цікавы і важны проєкты. Катеґориі, в якых мож зголошувати орґанізациі, то м.ін. соспільна політика, культура, нацийональна спадковина ци реліґійна достоменніст. Окрем нагороды Grand Prix, до лавреата трафит 5 тис зл. Дану орґанізацию може зголосити інча орґанізация, приватна особа, реліґійна єдиниця, аж і орґан публичной адміністрациі. Формуляр находит ся на сайті Воєвідства malopolska.pl.

Грыбова шаленота

Остатні дни то найліпшый час для любителів збераня грибів, котрых высыпало так вельо, што декотры зберают іх аж і по 100 правидвків за єдну годину. Кєд іде о ґорлицку землю, то бесідуют, што высып грыбів є в лісах в околици Ждыні, Білянкы, Сяр, Вуйтовой ци Быстрой. Скуп грибів веденый є в Ропици Польскій, ціны залежат од обставин. На тепер за кільоґрам правдивків мож достати 10 злотых. Рекорд в остатніх днях встановил чловек, якій принюс аж 60 кґ грибів – хоц більшіст была хробачна, за такы мож достати по 2 зл за кільоґрам. Найвеце росне правдивків, лишівок уж такой неє. З огляду на велику спеку, яка ся фурт утримує, неє што рахувати на більше грибів. Допіро кєд дакус поліє, буде мож зас выбрати ся з кошыками 🙂