Сумар дня на 28. січня/януара 2021 р.

Приносиме вам сумар медияльной ґрупы ЛЕМ.фм+ на ден 27. січня/януара 2021 р.

«Річник Руской Бурсы» за 2020 рік доступный онляйн

Перед даякым часом інформували сме, што вышол «Річник Руской Бурсы» за 2020 рік, якій можете очывидно придбати в друкуваній версиі. Днес заявляме, што послідній Річник єст доступный і в електронічній версиі на нашым сайті. Старчыт войти на порталь www.lem.fm, дальше зазрити в нижній части сайту до «Діґітальной Бібліотекы РБ» і найти як раз збірку, де находят ся «Річникы Руской Бурсы». Книжку можете отворити через переглядачы на компутері або смартфоні, але так само записати файль на своім ґратю. Шістнадцете выданя Річника посвячене єст темі «Лемківского/русиньского меджевоєнного періоду». Публикацию зрыхтувала як головна редакторка др габ. Олена Дуць-Файфер. Посвяченый є він in memoriam Богданови Ґамбальови. В выданю находят ся статі авторства м.ін. Богдана Горбаля, Анджея Зємбы, Олены Дуць-Файфер, Даміяна Новака ци Павла Роберта Маґочія. Публикация чыслит близко 300 стран. Выдавцьом окрем Руской Бурсы в Ґорлицях єст Академіцка Книгарня в Кракові. Заохочаме чытати.

Книжка остала выдана завядкы дотациі Міністра Внутрішніх Справ і Адміністрациі та з фінансовом підпором Міністра Культуры і Нацийональной Спадковины з фонду Промоциі Культуры. Річник Руской Бурсы 2020 мож стягнути за тым мотузком.

Вмер Ян Кромпащік, автор русиньскых співанок

Як інформуют Русины з Пряшівщыны, 22. січня/януара на 62 році жытя вмер Ян Кромпащік, родак з Чырча. Автор понад 250 русиньскых співанок. В плянах мал незреализуване выданя збіркы своіх авторскых співанок. Был «дворным» писательом текстів про веце капель, головні тых в Чырча (ґрупы Rolland, Juno ци Medium). Кромпащік найвеце своіх авторскых співанок записувал по русиньскы. Як повіл в недавным інтервю для радия Русин.фм – писал іх по чырчаньскы. Свою пасию перенюс і на своіх штырьох сынів і внучкы. Його сын Янко повіл, што отец не хотіл, жебы люде плакали, але тішыли ся і по його смерти. Желаня Яна Кромпащіка Чырчане сполнили, кєд по його смерти звучали зо сельского розгласу співанкы, котры він зложыл. Родакы з Чырча заповіли, же хотят выдати книжку його співанок під назвом «На няньовым поли».

Коли модернізация басену «Фаля»?

Быти може в найблизшым часі Ґорличане дознают ся про пляны реализациі ремонту басену «Фаля». Перше другій етап ремонту мусіл быти перенесеный на пізнійшый термін через початок пандеміі. Кєд повело ся провести конкурс оферт на ремонт, іх ефект не был корыстный. Оферты перекрачали кошты, на котры стати было місто. І так надале ніт принятой оферты од фірмы, котра бы такій ремонт провела. Само місто плянує ся темом зас заняти. В пляні найблизшой сесиі Рады Міста, яка проходит днес, нашол ся пункт, котрый буде односил ся до зміны буджету на 2021 р. Найправдоподібнійше зміны будут введены, жебы звекшыти доцільово фонды на ремонт ґорлицкого басену. Зміна буджету заєдно означат, же дака інча інвестиция може стратити част свого фінансуваня. Рішыня Рады Міста уж днес.

В «Series Byzantina» про Новосільского

Рыхтуване є найновше выданя періодику «Series Byzantina» (2020), якій посвяченый буде творчости Юрия Новосільского. В книжці мают найти ся материялы з конференциі орґанізуваной через о. проф. Михала Яноху. Як інформуют выдавці, до публикациі приниманы сут статі та короткы рапорты з выстав, конференций, омовліня поєдных творів. Дописы мож присылати до кінця червця/юнія тр. Тексты будут публикуваны м.ін. по анґлицкы, французскы, німецкы і росийскы. «Series Byzantina» то річник посвяченый візантийскій штуці. Выдаваный єст од 2003 р. Остравскым Університетом во спілпрацы з Польскым Інститутом Студий над Штуком Світа та Університетом Кардинала Стефана Вышыньского. Посліднє выданя має презентувати жытя і творчіст Юрия Новосільского, якого рід выходит з Одреховы.