Приносиме вам сумар медияльной ґрупы ЛЕМ.фм+ на ден 28. жолтня/октобра 2020 р.
Протестували коровы…
В неділю, 25. жолтня/октобра, прошол на Лемковині нетиповый протест. Краківска артистка Цецилия Малік вєдно з жіночым колективом Сестры Рікы, жытелями Мысцовой та Фондацийом Greenmind і Коалицийом Ратуйме Рікы зорґанізували нештоденну артистичну подію – протест коров під гаслом «Коровы бесідуют НІ резервуарови Конты-Мысцова». З огляду на епідемічну ситуацию то коровы мусіли в імени жытелів і любителів Низкого Бескіду выразити протест взглядом урядовых плянів будуваня штучного резервуару на Вислоці. Уряд хоче поставити гын 43-метрову таму, што подля протестуючых доведе до деґрадациі природы та зорваня соспільных реляций. Парусот жытелів буде выселеных, дале не знатя де. Цецилия Малік підкрислят, што непонятым єст, же в ХХІ ст. плянує ся выселити люди, знищыти памятковый храм та заляти цмонтір і терены нацийонального парку під никому непотрібный резервуар. Цілю акциі є звернути увагу цілой Польщы, што єдна з красшых долин Низкого Бескіду має быти затоплена.
Поправила ся туристика в ПСК
Пандемія коронавіруса в більшости приносит планны вісти. Але в примірі туристичного руху в Пряшівскым Самосправным Краю мож бесідувати о розвитку в літніх місяцях. Як інформувал Марек Гудак з Інституту Розвитку ПСК, рестрикциі звязаны з епідемійом спричынили, што в липци/юлію і в серпни/авґусті евідуваных было в Пряшівскым Краю 650 тисячів ночувань домашніх туристів, а то о 50 тис. веце як минулого рока. Єднак чысло ночувань заграничных туристів значучо впало – з 332 тис. за тамтот рік, до 197 тис. в тым році в літніх місяцях. Як дальше інформувал Марек Гудак, інтересуючым было, што аж в 8 з 13 окресів ПСК было в літніх місяцях веце домашніх туристів зо Словациі як перед роком. То окресы: Гуменне, Кежмарок, Меджелабірці, Левоча, Попрад, Снина, Стропків і Свидник.
Drive thru – мобільный пункт побераня вымазів в Ґорлицях
Вчера в Ґорлицях рушыл мобільный пункт побераня вымазів до тестів на коронавіруса – drive thru. Пункт находит ся на обшыри шпыталя, попри аеропорті, візд находит ся од ул. Венґєрской. Пункт єст отвореный каждого дня од 7.00 до 11.00 год. До пункту мож підіхати автом, што дозвалят ограничыти контакт з інчыма пациєнтами. Додатково, директор ґорлицкого шпыталя, з увагы на епідемічну ситуацию, звертат ся до вшыткых парохій, похоронных закладів і родин вмерлых осіб, жебы як найскорше одберати тіла вмерлых близкых осіб зо шпытальной просекториі. Тырваюча епідемія спричынят більше чысло вмерлых та долшый час триманя тіла, а місц уж тепер бракує – шпыталь змушеный был хоснувати зовнішню просекторию, але тото поправило ситуацию лем на пару дни.
Музей в Старій Любовни приступный для гендікепованых ґруп жытелів
Любовняньскій Музей в Старій Любовни реализує два проєкты для гендікепованых ґруп жытелів. Першым є достосувати скансен і єдну деревяну хыжу до практичных активности для осіб з автизмом. Як пояснят Олітілия Барликова, музейна педаґоґічка, особы з автизмом потрібуют мати допереду зрыхтуваный плян візиты, котра іх чекат. Зато ціле оточыня скансену буде сфотоґрафуване, а знимкы будут доступны на сайті музею. Для осіб з автизмом рыхтуют тіж творчы варштаты в окремій деревяній хыжы, вчас котрых будут мочы познати традицийны ремесла. Другій проєкт музею має приближыти жытя в граді протягом століть посередництвом ілюструваных приповідок для сліпых, слабовидячых і глухых. Окрем того експозициі будут дополнены дотыковыма моделями та підписами в браільовым писмі. На оба проєкты музей здобыл 11 тис. евро дофінансуваня з Міністерства Культры Словацкой Республикы. Завершены мают оні быти до кінця 2020 рока.
Коментарі