Сумар дня на 29. червця/юнія 2022 р.

Приносиме вам сумар медияльной ґрупы ЛЕМ.фм+ на ден 29. червця/юнія 2022 р.

Проф. Маґочій про істнуваня Русинів

Стрічом в Варшаві в понедільок, 27. червця/юнія, зачал ся цикль промуючый польскє выданя книжкы проф. Павла Роберта Маґочія пн. «Pod osłoną gór. Dzieje Rusi Karpackiej i Karpatorusinów». То бодай перша моноґрафія, в якій находиме історию Карпатской Руси і жыючого там населіня – карпатскых Русинів, дана чытачам в так приступный спосіб. По представліню особы проф. Маґочія і його наукового доробку, прошла дискусия на звіданя од ведучых стрічу та од публикы. Вчера дальша стріча прошла в Кракові, днес в Ґорлицях, а в дальшых днях стрічы одбудут ся іщы в Саноку і в Зындрановій. Русины вызнаны сут як окремый нарід по цілым світі, лем не на Украіні. Стрічы з професором не раз были там опротестуваны, примірово так ся стало на презентациі книжкы професора в вересни/септембрі 2021 рока.

Лемківскій Кєрмеш в Заменицях

Ґміна Хойнів та грекокатолицка парохія покровы Рождества Св. Йоана Крестителя в Заменицях просят на Лемківскій Кєрмеш до села Замениці. По акафисті до св. Йоана Крестителя в проґрамі находят ся выступы ґруп: Ластівочка з Пшемкова, Ґолішовяне з Ґолішова і Розтока з Рудной. Головным пунктом кєрмешового проґраму є ґаля-концерт проходячого в тых днях Фольклористичного Фестівалю «Світ Під Кычером». В рамках ХХV едициі выступлят ансамблі м.ін. з Мексику, Чіле, Бурунді, Турциі, Непалю ци Колюмбіі. Окрем ґальового концерту в Заменицях, выступы заплянуваы сут іщы м.ін. в Ліґници, Польковицях, Хобєні, Шпротаві, Лісци ци Вроцлаві. Лемківскій Кєрмеш в Заменицях пройде в суботу, 9. липця/юлия.

Дофінансуваня на опрацуваня стратеґій для міста і ґміны Ґорлиці та ґміны Санкова

В понедільок, 27. червця/юнія, торжественно підписали і передали догваріня на опрацуваня і зрыхтуваня стратеґій для Зінтеґруваных Територияльных Інвестиций на рокы 2021-2027. Стоваришыня Ґорлицка Функцийональна Обшыр, в склад котрой входят: місто Ґорлиці, ґміна Ґорлиці та ґміна Санкова, отримало дофінансуваня близко 164 тис. зл. Ґаранциі дофінансуваня одобрали з рук маршалка малопольского воєвідства Вітольда Козловского. Дофінансуваня буде презначене на зрыхтуваня і опрацуваня стоваришыньом територияльных стратеґій. Документы окрислят найважнійшы ціли і ініциятивы передвиджены до реализациі в фінансовій перспективі років 2021-2027 через підметы з реґіону єдиниц територияльного самоуряду, якы входят в склад реченого стоваришыня.

Ватра має якістный проґрам

Явил ся дрібницьовый проґрам ХІ Русиньской Ватры в Малым Липнику, котра пройде 8. і 9 липця/юлия. Фестіваль пропонує не лем приємну розрывку, але і едукацийны активности. В проґрамі є м.ін. прелекция про овчарство – як ховали, як лікували звірята, якы были звыкы ци ритуалы звязаны з пастырском культуром. Так само на пятницю (але і на субтоту) заплянуваны сут школы танця, окремо в суботу пройде презентация книжкы з байками Ганса Андерсена в тлумачыню на русиньскій язык та паліня ватры. Концертову част заполнят ансамблі Русин Чендеш Орхестра, Черговчан, Барвінок ци Лабірскы Бетяре. Выбір з танцювально-драматичного представліня «Хырбетом ку горам» запрезентує ансамбль Рутенія з Братиславы. Радийо ЛЕМ.фм тримат медияльный патронат над подійом.