Сумар дня на 29. грудня/децембра 2022 р.

Приносиме вам сумар медияльной ґрупы ЛЕМ.фм+ на ден 29. грудня/децембра 2022 р.

Mихалівскій Кружок СЛ і пожарникы садили деревка на ватровиску

На михалівскым ватряным поли садили деревка. Было то можливе завдякы спільній ініциятиві членів Кружка Стоваришыня Лемків в Mихалові і пожарникам з місцевой Охотничой Протиогньовой Стражы. Саджыня дерев одбыло ся 10. грудня/децембра. В сумі в рамках тых волонтерскых діянь повело ся посадити більше як 100 дерев. То добра ініциятива, кєд же вшыткы знаме, же коли проходят шторічны Лемківскы Ватры на Чужыні, то дост часто за дня світит высоко сонце. Надійме ся, што деревка будут скоро роснути, так што внет буде мож ся під нима скрывати перед спекотом. Лемківска Ватра на Чужыні все проходит в першый полный вікенд серпня/авґуста. В ближучым ся, 2023 р. одбуде ся уж 43. едиция той подіі.

Колядуваня в Камюнці

Уж днес в Камюнці проходит подія під назвом Дни Русиньскых Звыків і Традиций Села Камюнка, яка є орґанізувана м.ін. Русиньском Обродом на Словациі. В рамках той святочно-новорічной стрічы о 18.00 год. в грекокатолицкій церкви свв. Петра і Павла вызвучыт концерт русиньскых колядок. Пак, о 19.30 год. в місцевым культурным домі буде презентуваный фольклорный проґрам під назвом Заспівайме собі. В рамках подіі запрезентуют ся такы русиньскы ґрупы з Пряшівщыны як Хемлон з Гуменного, Гачуре з Землпина, Босорочкы з Гуменного, Роса з Пряшова, солистка Івана Брільова та Камюньскы Колективы.

Конец консерваторскых прац в Перегримці

Як інформує Підкарпатскій Воєвідскій Консерватор Памяток в Перемышли, в тых днях завершено штырілітні консерваторскы і реставраторскы працы при престолі в православній церкви св. Михала Архангела в Перегримці. В тым році продолжали позолотничы роботы. Консерватор в рамках свойой роботы лучыл добрі сохранены части первістных золочынь і частично іх реконструувал в місцях, де тоты ориґіналы ся уж не остали. На конец престіл был назад замонтуваный в середині церкви. Церков в Перегримці была вознесена в 1872 р. Подля оціны консерватора, середина храму є оздоблена вынятково богатым выпосажыньом і розписом; в історично-артистичный катеґориях інтерєр храму належыт до найліпше сохраненых в полуднього-східній Польщы. Престіл был выконаный рівно з іконостасом – в роках 1872-1887.

Львівска «Лемковина» рекрутує хористів

Народный Ансамбль Пісні і Танця «Лемковина» з Рудна, што на Украіні, оголосил набір хористів. Сконтактувати ся з колективом мож за посередництвом поданого на афішы номеру телефону або через Фейсбук. Не є подана докладна дата переслухань. Ансамбль «Лемковина» часто в Польщы є окрисляный як «Лемковина» зо Львова на розділ од другой «Лемковины» – славного колективу з Білянкы, зорґанізуваного і долгы рокы веденого Маестром Ярославом Трохановскым. Подібні як «Лемковина» з Лемковины, тота з Украіны тіж в 2019 р. святкувала ювілей 50-літя істнуваня. Членами львівской «Лемковины» были початково выключно переселенці з Лемковины, пак пришли до ней уж іх потомны. «Лемковина» з Рудна старат ся наштоден презентувати лемківскы народны і авторскы пісні.