Сумар дня на 29. грудня/децембра 2023 р.

Приносиме вам сумар медияльной ґрупы ЛЕМ.фм+ на ден 29. грудня/децембра 2023 р.

Становиско меншыновой стороны СКУтНіЕМ в справі дискримінациі німецкой меншыны 

Меншынова сторона Спільной Комісиі Уряду та Нацийональных і Етнійчных Меншын опубликувала становиско в справі завершыня правной дискримінациі німецкой меншыны в обшыри вчыня меншынового языка. Члены комісиі звернули ся до польского премєра з апельом усунути Радом Міністрів розпоряджыня Міністра Едукациі і Наукы з 4. лютого/фебруара 2022 р., котре ограничыло тыжньове чысло годин вчыня меншынового німецкого языка з трьох до єдной. Апелювали і взяти до увагы в буджеті державы на будучый рік фінансовы середкы на приверніня вчыня німецкого в такым вымірі як в припадку другых меншын. Як мож чытати в становиску, анулюваня або зміна розпоряджыня буде мала символичный і едукацийный вымір, вказуючы, же в Польскій Республиці неє місця на дискримінацию громадян в опертю о нацийональну критерию, а записуваня в принципах права дискримінацийных норм єст недопущальне і не містит ся в правным порядку демократичной державы.

Крениця штораз ближе будовы санечкового тору

Як інформувал бургомайстер Крениці Пьотр Рыба, 2023 рік кінчат з черговыма документами, приближаючыма до будовы санечково-бобслейово-скелетонового тору. По перше, на основі природничой інвентаризациі зрыхтуваной на Горі Івонка был створеный «Рапорт виляня на середовиско» той інвестициі. Брак міґрацийных корытарів звірят і брак сідлиск стисло хороненых ґатунків потверджат, же локализация тору єст выбрана оптимально. По другє, завершеный был етап рыхтуваня проєкту місцевого пляну просторного заґаздуваня, котрый передвидує м.ін. будову реченого тору на Горі Івонка. В січни/януарі проєкт пляну буде переданый до догварінь.

Социяльна ініциятива проти марнуваню іджыня

В тым святочным періоді конечно треба дбати о тото, жебы зрыхтуване ідло ся не змарнувало. Часто робиме веце страв, як потрібуєме, а товды мож ся нима поділити з другыма. До той ціли можут нам послужыти примірно социяльны ледівкы. Ініциятива социяльной ледівкы стає в Польщы популярнійша. Ідейом єст протидіяня марнуваню ідла, і єдночасно поміч потрібуючым. Социяльна ледівка стоіт м.ін. в Польковицях, де єст одкрыта цілу добу. Важне єст, жебы лишане в ней ідло не было по терміні, а тым барже зопсуте. Стравы або продукты без ориґінального опакуваня повинны быти описаны. Ледівкы найдете в великых містах як Варшава ци Краків, але і в меншых, як Крециня, Ліґниця, Любін ци спомнены уж Польковиці.

Велийна Стріча в Рускій Бурсі і презентация різбленых діаконьскых двери в Бортным

Припоминаме, што уж днес в Рускій Бурсі в Ґорлицях проходит Велийна Стріча. Початок o 16.00 год. В проґрамі выступ бурсяного ансамблю Терочка з нашыма колядками, вінчуваня, пробуваня смаків Святого Вечера і спільне колядуваня. Так само днес, в церкви свв. Космы і Даміана в Бортным, о 14.00 год. заплянувано презентацию новых діаконьскых двери, котрых творцями сут Богдан Карел і Петро Криницкій. Різба в подобі неістнуючых діаконьскых двери в бароковым іконостасі з XVIII столітя возникла в рамках стипендияльного проґраму «Мастер-Ученик» фінансуваного з середків Міністра Рільництва і Розвитку Села. Цілю проґраму было вчыня традицийного ремесла звязаного з реґіоном Лемковины, з котрого походят мастер і ученик.

Новорічны желаня

В найблизшу неділю будеме пращати 2023 р. Зато уж тепер хочеме передати вшыткым Вам новорічны желаня. На тот Новый 2024 Рік желаме Вам вельо радости, здоровля, спокою і вшыткого, чого си лем захочете. Най же цілый 2024 рік буде про нас ліпшый як старый. Желаня передає ансамбль медияльной ґрупы ЛЕМ.фм+ та члены Стоваришыня «Руска Бурса» в Ґорлицях.