Сумар дня на 29. листопада/новембра 2021 р.

Приносиме вам сумар медияльной ґрупы ЛЕМ.фм+ на ден 29. листопада/новембра 2021 р.

В горах тяжкы погодовы условія

В горах мож уж обсервувати початкы зимы. Прогулькы в высшы партиі Бескідів можут быти неможливы з причыны тяжкых погодовых условій. Ратівник Креницкой Ґрупы Гірской Охотничой Ратівничой Службы Лукаш Сметана остерігат не лем перед снігом, але і ледовом покрывом. В высшых партиях гір, выже 1000 м н.р.м., значыт головно в околицях хырбету Радієвой, єст уж вельо снігу, котрый утруднят пішы вандрівкы. Туристы мусят тіж думати на тото, же приморозкы і локальна ледова покрыва на шляках выступує уж і выже 800 м н.р.м. Додатково, подля проґноз синоптиків, в найблизшых днях в горах має курити сніг.

Небезпечны условія і на дорогах

Зміны погоды в цілій Малопольщы, першы сніжыці і замерзаючый дощ, спричыняют небезпечны условія і на дорогах. Як обіцює директор новосандецкого Повітового Заряду Доріг, Адам Червіньскій, дорогы в повіті сут уж під контрольом дороговців, котры будут іх одсніжати. Мимо браку снігу на вельох дорогах єст уж єднак слизко і небезпечні, што вымагат векшой увагы од водителів. Найбарже небезпечні може быти на нововыремонтуваных одтинках доріг, бо свіжый асфальт єст там гладкій і в результаті слизкій. Директор Повітового Заряду Доріг в Новым Санчы остерігат м.ін. перед тяжкыма условіями на недавно ремонтуваным одтинкну повітовой дорогы 1510 К Берест – Мохначка Выжня, од Мохначкы през Чырну в сторону Перункы. Дороговці припоминают тіж, же то уж остатній добрый момент на выміну опон на зимовы.

Енді Варголь в Новым Санчы

Творы єдного з найвызначнійшых в світі русиньскых артистів, Енді Варголя, буде мож тепер обзерати і в Новым Санчы. Музей Модерной Штукы Енді Варголя в Меджелабірцях і Ґалерия Модерной Штукы БВА в Новым Санчы просят на выставу посвячену корольови поп-арту пн. «Енді Варголь …од початку і назад». Вернісаж выставы одбуде ся в пятницю, 3. грудня/децембра тр., о 18.00 год. в будинку Ґалериі Модерной Штукы БВА СОКІЛ в Новым Санчы. Жебы взяти участ в вернісажы, якій буде проходил в санітарным режімі, треба перше потвердити свою участ в терміні до 2. грудня/децембра телефонічні або майльовом дорогом. Гоноровый патронат над выставом тримают Маршалок Малопольского Воєвідства Вітольд Козловскій та Ґенеральный Консуль Словацкой Республикы в Кракові Томаш Кашай. Выставу мож буде обзерати в Новым Санчы до кінця січня/януара будучого рока.

Інвестициі в рамках креницкого громадяньского буджету уж в стані реализациі

Як поінформувал бургомайстер Крениці Пьотр Рыба, тогорічны інвестициі выбраны жытелями креницкых осіль в рамках громадяньского буджету сут уж в стані реализациі. Тым разом на проєкты пeреданых было разом 200 тис. злотых. Проєкты тыкали в більшости выміны і модернізациі уличного освітліня. Як подал бургомайстер Крениці, догваріня тыкаючы зміны освітліня были підписаны в тым місяци, а квоты вызначены осілями на тоту ціль были ним піднесены, так жебы нове ледове освітліня могло мати разом парунадцет улиц в Креници і Тыличы. Част прац буде завершена до кінця текучого рока, а част на початку будучого.

Зимовы онляйновы выклады на сайті Татряньского Нацийонального Парку

Татряньскій Нацийональный Парк простит на цикль короткых онляйновых выкладів, якы будут ведены каждого зимового тыждня на фейсбуковым профіли Парку. Коло год. 7.15 рано в понедількы Марек Кот з паркового Ансамблю Активной Едукациі буде бесідувал о татрияньскій природі, горах і іх жытелях. Короткы выклады будут пак записуваны на фейсбуковым сайті Парку.