Сумар дня на 29. листопада/новембра 2023 р.

Приносиме вам сумар медияльной ґрупы ЛЕМ.фм+ на ден 29. листопада/новембра 2023 р.

Хыжа Маестра в огни…

Вчера пару минут по 18.00 год. єдиниці протиогньовой стражы были задиспонуваны до гашыня пожару в селі Білянка. На жаль, оген занял хыжу родины Маестра Ярослава Трохановского. На місци робили єдиниці професийной Ратівничо-Гасничой Державной Стражы Пожарной з Ґорлиц та єдиниці Охотничой Стражы з Білянкы, Быстрой, Шымбарку і Кобылянкы. На щестя никому нич поважного ся не стало, але конечне было закликати амбулянсы – треба было схоснувати дыхальны апараты і вентиляторы до оддымляня. Кєд будеме мати більше інформаций – передаме іх в пізнійшых новинах.

Кєрмешы в Михалові і Пшемкові

В минулым тыжни прошли два парохіяльны праздникы серед православной спільноти в Михалові і в Пшемкові, самособом – по части тіж серед лемківской громады. 21. листопада/новембра в ден св. Архангела Михала прошло храмове свято в церкви в Михалові, любіньского деканату. Літургію целебрувал о. прот. Євгеній Буйко з Вроцлавя в асисті шестьох інчых священників з вроцлавско-щеціньской єпархіі та пароха в Михалові о. Адама Гробаля. Тот на конец передал благословліня од ординария єпархіі владыкы Юрия, подякувал за присутніст, особливы слова подякы передал для радной ґміны Хоцянів Анны Горощак, яка веде місцевый хор, та для шолтыса села і старосты церкви Юрия Куземчака. Другій храмовый праздник прошол того самого дня в церкви покровы Михала Архангела в Пшемкові, де як раз присутный был владыка Юрий, архієпарха вроцлавскій і щеціньскій, очолювал він літургію в асисті девятьох інчых духовных. Присутны на святі были і місцевый римокатолицкій парох, бургомайстер Пшемкова Єжы Щупак, заступця бургомайстра Магдалина Каня і Надлісничый Пшемкова Реміґіюш Хшановскій. Владыка Юрий нагородил місцевого пароха о. Ігоря Поповича медальом св. Мариі Магдалины ІІ ступени з оздобами і памятковым крестом з оздобами за душпастырску роботу, проведены ремонты і річницю 45-літя священничого стану. Медальом св. Мариі Магдалины ІІ ступени дозначыл тіж імость Ніну Попович.

Засіданя Єпархіяльного Братства Православной Молодежы в Ґорлицях

В суботу 25. листопада/новембра Божеском Літургійом в Катедрі св. Тройці в Ґорлицях целебруваном о. мит. Юлияном Феленчаком зачало ся Головне Засіданя Єпархіяльного Братства Православной Молодежы. Зо словами до молодежы звенрул ся ординарий ґорлицко-перемышльской єпархіі владыка Паісий, якій ствердил, што Церков потрібує енерґіі, ентизиязму і младенчых ідеалів, так штобы Євангелия могла проникати в соспільніст. По слові архієпархы одчытано мериторичный і фінансовый справописы получены з мультімедияльном презентацийом діяльности Братства. По голосуваню уділено абсолюториюм зарядови Братства і принято календар на надходячый рік діяльности з особливым увзглядніньом і підкрисліньом ювілею 100-літя автокефалиі Православной Церкви в Польщы. Для ліпшой діяльности Браства в орґанізациі ювілеів запропонувано покликаня єпархіяльного координатора дс. молодежы, котрым остал о. прот. Андрий Ґрич, та вызначыли двох духовых опікунів Братства: о. митр. Юлияна Феленчака і о. прот. Ярослава Ґрича.

Дармова поміч містной стражы

Польковичане, котры мают проблем з урухомліньом авта, бо акумулятор одмовил роботы, можут рахувати на дармову поміч містной стражы. І – хоснуют єй. Каждого дня є аж і до десятьох зголошынь. Акция тырват через цілый рік і цілу добу, але особливо зимом, з відомых причын, зголошынь є веце. Жебы зголосити проблем старчыт задзвонити під алярмовый номер 986 або 76 746 40 24. Зголошаючый мусит подати дыжурному своі персональны даны, марку і реґістрацийный номер авта і місце, де стоіт. На місци страж провірят, ци дана особа є властительом авта.