Сумар дня на 29. марця 2022 р.

Приносиме вам сумар медияльной ґрупы ЛЕМ.фм+ на ден 29. марця 2022 р.

Патріарха Варфоломій І приіхал до Польщы 

В неділю, 27. марця, зачала ся тридньова візита в Польщы Вселеньского Патріархы Варфоломія І. Першым єй пунктом была доксолоґія – привитаня в каплици свв. Кірила і Методия в Варшаві, яка находит ся при митрополитарній катедрі на варшавскій Празі. Пак патріарха стрітил ся з грецком спільнотом, православныма духовныма і біженцями з Украіны, котры затримали ся в Центрі Православной Культуры в Варшаві. Подякувал він за запрошыня і поміч, яку Полякы несут біженцям. Підкрислил, же молит ся за Украінців, а тіж подякувал митрополиті Саві за духовну опіку над прожываючыма в Польщы Греками. Вчера в святыни Агія Софія проходила стріча, в часі котрой патріарха Варфоломій стрітил ся з православныма жытелями столиці, біженцями і вшыткыма охочыма. Днес на конец свойой візиты в Польщы, патріарха стрітит ся з представниками римокатолицкого Костела.

Онедолга мож буде обзерати выставу Мирослава Трохановского 

14. квітня/апріля в ґорлицкій Ґалериі Двір Карвациянів пройде вернісаж выставы Мирослава Трохановского пн. «Украіньскє козацтво». Початково выстава мала наголовок «Місто нескінчене», але як пояснят автор, з причыны атаку Росиі на Украіну рішыл змінити характер експозициі. Тым самы хоче вказати свою підпору воюючым о свойу державу Украінцям. Мирослав Трохановскій єст выдатным лемківскым іконописцьом і малярьом. Єст основательом карпатской працовні іконописаня в Білянці під назвом «Мандиліон». Занимат ся він тіж малюнком, рисунком і різбом. Цікавит го реалистичне і абстракцийне малярство. Його творчіст то головно навязуваня до істориі украіньскых козаків, як тіж русиньскых збійників. Творит і карпатскы краєвиды і лемківскы церкви. Выставу мож буде обзерати до 11. мая.

Писанкы, святочны прикрасы і локальны ремісникы – тото вшытко на Великоднім Ярмаку в Лоси  

Мазярска Загорода в Лоси просит на Великодній Ярмак. Подія пройде в найблизшу неділю – 3. квітня/апріля. Як што рока в святочным періоді орґанізуваный єст великодній ярмак, цілю котрого єст промувати культуру Лемків і Погірян. В проґрамі подіі найде ся штоси для каждого. Діти будут мочы взяти участ в варштатах робліня великодніх прикрас, м.ін. писаня писанок. Ярмак зачне ся о 10.00 год. і од того моменту мож буде купувати ручні роблены святочны прикрасы і традицийны стравы. Запрезентуют ся тіж локальны ремісникы. В проґрамі окрем кєрмешу і варштатів, находят ся тіж великодні забавы і выстава «Писанкы. О символах і традициі».

«Крениця єст єдна, а міста сут два» 

Староста Нового Санча, Марек Квятковскій, потвердил, же і того рока пройде роверова промоция Крениці. То буде 7. едиция Креницкого Роверового Райду. Ґрупа любителів біциґльовых подорожы з малопольской і поморской Крениці, в рамках туристичной промоциі та інтеґрациі обох самоурядів, підняла ся задачы переіхати понад 1000 км в 12 дни. Выстартуют кінцьом мая з Крениці Морской, а на Лемковину доіхают 11. червця/юнія. В тогорічній едициі райду участ возме тіж жытелька Украіны, котра втікаючы перед войном, нашла поміч на Сандеччыні. Як і в попередніх роках, акция проходит під гослом «Крениця єст єдна, а міста сут два».