Сумар дня на 29. мая 2024 р.

Приносиме вам сумар медияльной ґрупы ЛЕМ.фм+ на ден 29. мая 2024 р.

Наше радийо зас чути на заході

Передаєме Вам добру віст. По долшым моменті тишы – вернул наш сиґнал надаваный з высылача в Польковицях на частоті 103,8 MHz. То часове розвязаня. Фурт мусиме змінити локализацию нашого высылача в звязку з ремонтом комина в Польковицях, зато теперішня емісия сиґналу є лем часова. То тіж не означат, же уж не маме проблемів… Єдным з них єст проблем з доступом до інтернету в Якубові, де найпевнійше найдеме нову локализацию для высылача. Охочы помочы – будеме вдячны за контактуваня ся з нами: radio@lem.fm.

«Меншыны і іх языкы в кризі»

В пятницю 7. червця/юнія в Ґалериі Штукы Двір Карвациянів в Ґорлицях пройде промоция книжкы пн. «Меншыны і іх языкы в кризі», котра была выдана в рамках реализациі проєкту Языковый антодот. Публикация возникла в результаті спілпрацы дослідників з експертами з меншыновых соспільности: лемківской, кашебской, шлезской і вілямівской. Публикация анализує влияня досвідчаной меншынами дискримінациі на іх здоровля і добростан, але тіж хосен з бесідуваня в рідным языку ци тіж наслідства пандеміі. В опрацуваню находят ся практичны рекомендациі і розвязаня, якы можут помочы поправити обставины фунґуваня меншыновых ґруп в Польщы. Прелеґентками вчас стрічы в Ґалериі Штукы в Ґорлицях будут дві дослідничкы, активні діючы для ревітализациі языків, выдатны вчены: проф. Олена Дуць-Файфер з Ягайлоньского Університету та проф. Юстина Олько, яка веде Центр Заанґажуваных Досліджынь над Культуровым Тырваньом на Выділі «Artes Liberales», што діє при Варшавскым Університеті, а котрый то Центр был реализатором проєкту.

В Котани зроблят Пункт Селективной Збіркы Комунального Смітя

В селі Котан, в місцевости ґміны Крампна, в самым серци Низкого Бескіду, буде зорґанізуваный Пункт Селективной Збіркы Комунального Смітя. Кошт інвестициі вынесе 2,5 млн зл. Догваріня на будову ґмінного пункту збіркы смітя підписали війт ґміны Крампна Катажына Мацєйчык та Адам Голендер, властитель коросняньской фірмы Флоен, котра буде выконавцьом інвестициі, а в конкурсі оферт дала найліпшу оферту. Векша част коштів, бо 2,3 млн зл, буде покрыте з дотациі, котру ґміна Крампна позыскала з Польского Ладу. Згідні з пляном пункт збіркы смітя має быти готовый протягом найблизшых 20 місяців. Обовязок орґанізациі такого місця выникат з Уставы з дня 13 вересня/септембра 1996 р. о утриманю чыстости і порядку в ґмінах. Пункт збіркы в Котани має быти загородженый, буде гын утвердженый пляц, контенеры під задашыньом, адміністрацийно-маґазиновый будинок і інформацийно-едукацийны таблиці. Додатково довкола цілой обшыри має быти насадженый густый жывоплот.

Соткы артистів на Перегляді Локальной Творчости в Польковицях

Минулый вікенд одбыл ся Перегляд Локальной Творчости. На сцені польковицкого амфітеатру запрезентувало ся аж парусот осіб. Перше прошли выступы діти, што репрезентували польковицкы едукаицйны пляцівкы, были артистичны ґрупы діючы при Осередку Социяльной Помочы, Стоваришынях ци Центрі Культуры. Были вокальны выступы, тіж танцювальны, вшыткых віковых ґруп – од предшколаків по сеньорів. Бургомайстер Польковиц Вєслав Вабік подал, што уряд прикладат велику вагу до промуваня локальных талантів, зато рішено змінити формулу – перегляд талантів не отверат уж Днів Польковиц, але має свою окрему дводньову подію. Імпреза притягнула чысленну публику.