Сумар дня на 29. січня/януара 2024 р.

Приносиме вам сумар медияльной ґрупы ЛЕМ.фм+ на ден 29. січня/януара 2024 р.

Нова голова грекокатолицкой Церкви на Словациі

Пряшів має нового грекокатолицкого архієпископа митрополиту. В минулу суботу 27. січня/януара в Катедральным Соборі св. Йоана Крестителя в Пряшові владыка Йона Йосиф Максим принял єпископску хіротонію і был інтронізуваный до свого уряду. Высокопреосвященнійшый Йона стал історично девятым пряшівскым єпископом од часу, коли в 1818 році одділіньом од Мукачівской Єпархіі выникнула Пряшівска Єпархія, днес митрополитна архієпархія, і другым пряшівскым митрополитом по ємеритуваным митрополиті Йоані Бабяку. Головным служытельом єпископской хіротоніі был архієпископ Кірил Василь, кошыцкій єпарха. Вєдно з ним єпископскє рукоположыня новогому митрополиті уділили дотеперішній апостольскій адміністратор Пряшівской Архієпархіі і братиславскій єпарха владыка Петро Руснак, і владыка Венедикт Алексійчук, чікаґскій єпарха Украіньской Грекокатолицкой Церкви. В торжественній подіі брало участ понад 50 єпископів східнього і латиньского обряду зо Словациі і заграниці. Медже нима были і представникы русиньскых церкви. Присутны были і представникы інчых віроісповідань – православной, євангелицко-ауґсбуржской і інчых церкви. Участ брали і репрезентанты локальных і державных власти. Веце про тоту історичну подію і нову голову грекокатолицкой Церкви на Словациі прочытате в дописі на нашым портали.

Перше засіданя Комітету до справ Малых Проєктів Інтерреґ Польща-Словация

Як поінформувало Стоваришыня Карпатскій Еврореґіон, 25. січня/януара взяли участ в першым, інавґурацийным засіданю Комітету до справ Малых Проєктів Інтерреґ Польща-Словация, в рамках пріоритету 4. Спілпраца інституциі і жытелів погранича, якым заряджат Пряшівскій Самосправный Край. Окрем омовліня орієнтацийного гармоноґраму діянь члены комітету затвердили м.ін. спис експертів до якістной оціны і склад комісиці до справ застережынь. По тым, як завершыт ся процес оціны проєктів, одбуде ся другє засіданя Комітету. Пак будут підписаны догваріня о дофінансуваня малых проєктів і пройдут школіня для іх бенефіциєнтів.

Нова велика інвестиция в Креници

Як поінформувал бургомайстер Крениці Пьотр Рыба, Крениця як реґіональный лідер туристичной бранжы дочекат ся інвестициі, котрой дотля не было на Сандеччыні. Інвестор, AQUA KRYNICA Sp. z o.o., запрезентувал концепцию будовы водного парку, котра єст основом до выконаня будовляного проєкту. На терені бывшого осередка Громада буде побудуваный аквапарк і готель. Інвестор, хоц терен купил лем в грудни/децембрі минулого рока, од долшого часу працувал над концепцийом готельово-рекреацийного комплексу в Долині Чорного Потока. Концепция закладат будову готельового комплексу і цілорічного водного парку з крытыма і зовнішніма басенами. Інвестор неодолга зачне проєктовы працы.

«Польковицка Золота Ручка Плюс»

Жытелі ґміны Польковиці выже 65. рока жытя, самітны або опікуючы ся особами з неполносправностями можут хоснувати безплатну поміч в дрібных домашніх працах і направах. Тырват четверта едиция проґраму «Польковицка Золота Ручка Плюс». В минулым році з проґраму скорыстало 102 сеньорів. Осередок Социяльной Помочы через свого працівника выконал 150 услуг для Польковичан, котры потрібували помочы. Проґрам потырват до кінця 2024 рока.