Сумар дня на 29. вересня/септембра 2023 р.

Приносиме вам сумар медияльной ґрупы ЛЕМ.фм+ на ден 29. вересня/септембра 2023 р.

ҐУС опубликувал таблиці з даныма про меншыны 

Польскій Головный Статистичный Уряд опубликувал вчера, 28. вересня/септембра, таблиці з фінальныма даныма в рамках нацийонально-етнічной приналежности, языка хоснуваного дома та приналежности до віроісповіданя. Як подали, анализы в рамках той тематичной обшыри і барже детальне зоставіня результатів разом з інформациями о методолоґіі опрацуваня даных будут заперезентуваны в окремій публикациі про стан та демоґрафічно-социяльну і економічну структуру населіня Польщы подля результатів нацийонального списуваня 2021, котра вкаже ся на конец листопада/новембра тр. За опубликуваныма таблицями Лемків єст в Польщы веце як было перше подане. За новыма даныма осіб з лемківском ідентифікацийом єст в Польщы 13 303, а лемківскій язык дома хоснує 6 147 осіб. Процентово найвеце єст нас на землях выгнаня, але і в Горах, в нижньошлезскым, малопольскым і любушскым воєвідствах. На звіданя о приналежніст до віроісповіданя одповіло неціле 80% анкєтуваных. З них приналежніст до віроісповіданя задекярувало понад 91%. Найчысленнійшом конфесийом в Польщы фурт єст римокатолицкій Костел, другым православна Церков, а третім Свідкы Єховы. Таблиці мож побрати з офіцийяльного інтернетового сайту Головного Статистичного Уряду.

Результаты ІІ етапу Урядового Проґраму Одбудовы Забытків

Міністерство Культуры і Нацийональной спадковины подало результаты ІІ етапу Урядового Проґраму Одбудовы Забытків. В його рамках на реализацию 3 248 проєктів было признане 1,8 млд злотых. Серед бенефіциєнтів проґраму в малопольскым воєвідстві нашли ся такы інвестициі як: ратунковы працы в забытковій церкви в Боґушы, ратунковы працы консерваторского типу при забытковій грекокатолицкій церкви і спіхліри в Бортным, консервация намістных ікон з першого іконостасу в забытковій церкви св. Миколая в Прислопі, консервация іконостасу в забытковій церкви св. Параскєвы в Новици, выміна електричной інсталяциі в забытковій церкви свв. Космы і Даміяна в Баници, ремот елевациі забытковой церкви св. Лукы в Ізбах і реновация камінного огороджыня вколо 19-вічной церкви в Матієвій. В підкарпатскым воєвідстві дофінансуваны будут м.ін. консервация іконостасу в церкви св. Михала Архістратига в Туряньску, консервация забытковой поліхроміі з презбітериі давной церкви в Завадці Рыманівскій, модернізация стропу давной грекококатолицкой церкви в Одреховій ци друга част перебудовы і забезпечыня руін церкви і дзвінниці в Кривым в ґміні Лютовиска.

Список явных задач в устній части матуры з лемківского языка

На початку того місяця был опубликуваный комунікат директора Центральной Еґзамінацийоной Комісиі в справі списку явных задач в устній части  матуры з лемківского языка як языка етнічной меншыны в 2024 р. В документі находит ся зміст пятдесятьох матуральных звідань (30 публикуваных скорше і 20 новых) на бесідувану част еґзаміну з лемківского языка. Зміст материялу, якій повинны переробити будучорічны матуристы, згідный з проґрамовом основом і односит ся такой до вшыткых найважнійшых авторів Лемковины, якы творили од ХІХ ст. по днешній час. Мотузок до комунікату найдете в статіі на нашым портали.

Закінчыня туристичного сезону в Біличній

В тоту неділю 1. жолтня/октобра в Біличній при церкви пройде закінчыня туристичного сезону 2023. Літургія в інтенциі туристів буде одправлена о 14.00 год. Пак на стоісках при церкви буде мож купити реґіональны стравы і продукты.