Сумар дня на 29. жолтня/октобра 2024 р.

Приносиме вам сумар медияльной ґрупы ЛЕМ.фм+ на ден 29. жолтня/октобра 2024 р.

Новы забыткы на листі вызначных памяток міста Пряшів

Два новы забыткы збогатили евіденцию вызначных памяток міста Пряшів. Сут то гріб єпископа Йосифа Ґаґанця на містецкым цмонтері та воєнных цмонтір з І світовой войны. О дописаню новых памяток рішыла Рада Міста Пряшів в часі остатнього засіданя, 23. жолтня/октобра. Тым самым список містит тепер уж 62 позициі. Додатково радны плянуют в наступным році опрацувати цифрву мапу забытків міста. Владыка Йосиф Ґаґанец, другій  єпископ Пряшівской Грекокатолицкой Єпархіі, был родом з русиньского села Вышній Тварожец. Через 33 рокы полніня функциі, Ґаґанец причынул ся до розвитку грекокатолицкой церкви, але тіж ціле жытя підтримувал Русинів. Більше про жытя і діяльніст єпископа Йосифа Ґаґанця можете прочытати в статі на нашым портали.

На Словациі одстрілили 12 медведів

По смертельным атаку медведя на 63-літнього мужчыну в підтатряньскым Гыбе початком жолтня/октобра, власти рішыли провесто одстріл аж 12 звірят, котры мали бы становити загороджыня для околичных жытелів. Про проведену акцию поінформувал міністер середовиска Словациі, Томас Тараба. Чысло забитых того рока медведів перекрочыло уж 80 особників. Принимат ся, што на Словациі выступує понад 95% західньокарпатской популяциі медведів, зас згідні з даныма Державной Аґенциі Охороны Природы популяция словацкых медведів рахує около 1200 звірят. Од початку рока нашы сусіды мают страпліня з медведями, котры підходят ближе міст і сел. Збільшат ся тіж чысло атаків драпіжників на люди.

Громадяньскій Буджет Малопольского Воєвідства жде на вашы думкы

До кінця жолтня/октобра мож зголошувати своі думкы в 8 едициі Громадяньского Буджету Малопольского Воєвідства. Кажде зголошыня буде провіряне працівниками маршалківского уряду. До 14. марця 2025 рока уряд опубликує листу принятых і одшмареных внесків. В наступным етапі вшыткы позитивні розсмотрены внескы будут допущены до голосуваня, а жытелі Малопольщы рішат, котры проєкты будут реализуваны. Як підкрислил маршалок Малопольского Воєвідства, Лукаш Смулка, проєкт дозволит на реализацию важных локальні ініциятив. Проєкт може зголосити каждый, хто скінчыл 16 років. На реализацию задач, котры выграют в голосуваню, уряд перезначыл 16 млн зл.

Ґміна Санкова разом з містом Демєн

Остатнім часом Ґміна Санкова розпочала бесіды про спілпрацу з містом Демєн (Demjén) находячым ся на Мадярах. Війт ґміны Санкова, Малґожата Малух стрітила ся з бургомайстром міста Демєн, Ляшло Менигартем (László Menyhártem). Головном цілю той ініциятивы єст навязаня та розвиток спілпрацы медже тым ґмінами, в ріжных обшырях діяльности, особливо в туристиці. Додатково порозумліня закладат спілпрацу медже позаурядовыма орґанізациями обох ґмін і іх жытелями. Така спілпраца отверат перед польском і мадярском сторонами новы перспективы, дає простір до выміны досвідчынь ци можливіст поправы туристичных услуг.