Приносиме вам сумар медияльной ґрупы ЛЕМ.фм+ на ден 3. червця/юнія 2020 р.
Необычні на засіданю Рады Ґорлицкого Повіту
Посліднє засіданя Рады Ґорлицкого Повіту проходило в необычный і раптовный спосіб. Уж на його початку в минулый четвер, 28. мая тр., зложено два внескы о зміну порядку засіданя. Першый, в імени 12 радників, о одкликаня з функциі ведучого рады повіту Мирослава Вальонґа з партиі Право і Справедливіст, зложыл Єжы Налепка з Польского Народного Сторонництва. Другій внесок, о одкликаня з заряду повіту шефа клюбу радных ПіС Томаша Платка, зложыла староста Мария Ґубала. Ведучый Вальонґ зарядил перерву в засіданю. Ствердил, што подля него найблизшый можливый термін на взновліня засіданя то текучый тыжден. Пару годин пізнійше двох заступників рады повіту зложыло освідчыня, в котрым жадают як найскорше взновити незаконно – за іх думком – перерване засіданя. Подля них, ведучый Вальонґ оголосил перерву без окрисліня часу єй тырваня. В понедільок, 1. червця/юнія, радны ґорлицкого повіту выстосували тіж в тій справі писмо до Малопольского Воєводы.
Климківка наполнена
По остатніх зливах дощу могучо поліпшыла ся гыдролоґічна ситуация в ґорлицкым повіті. Наполніня ретенцийного резервуару в Климківці то тепер такой 22 млн кубиків, зато резерва – близко 20 млн кубиків. Мария Ґубала, староста ґорлицкого повіту, повіла, што жытелі Ґорлиц i околиц не мусят ся старати, бо воды не бракне найменьше через 4-5 місяців. Климківка дає воду до питя і штоденного жытя не лем жытелям Ґорлиц, але і Ясла в підкарпатскым воєвідстві. Остатні два дни, то уж бездощова хвиля, зато і вода на ріках зачынат помалы опадати. Подля даных, на водовсказах рівен воды на ріках Санківка, Ропа, Вислок і Вислока утримує ся уж пониже остерігаючого стану.
Пентеон Русинів зас в красі
По 13 роках одновили Бескідскій Пантеон, якій находит ся на обшыри Нацийонального Парку Полонины на Словациі. Бескідскій Пантеон то символичный цмонтір вызначных особливости спід Полонин. Находит ся на трасі Стащын-Улич в окресі Снина. Посланьом Пантеону є однавляти памят о інтересуючых людях реґіону. Своє честне місце мают гын головні особливости русиньского походжыня, м.ін. будитель Александер Духнович, збійник Федор Головатый, співак і зберач народной штукы Юрий Колинчак ци ігумен Ігнатий, важный для православной соспільности на Словациі. Зарядительом Бескідского Пантеону є Нацийональный Парк Полонины. Він же передал інформацию, што Пантеон вымагал уж реконструуваня, треба было вымінити інформацийны табличкы, дати новы стоякы і зробити нову вхідну браму.
Безпечны іспыты завдякы KGHM Polska Miedź
Oд 8. червця/юнія зачынают ся матуральны іспыты та професийны еґзаміны. Більше як 420 літрів дезинфекуючого плыну і веце як 8,5 тисяча сашеток по 3 мл трафили до шкіл, де пройдут еґзаміны в польковицкым реґіоні, котры обняты сут патронатом KGHM Polska Miedź. То школы в Польковицях, Хоцянові, Любіні, Ґлоґові, Ліґници і Болеславци. З внесками о даровизну в формі плыну школы зголосили ся до Фундациі KGHM в рамках проґраму «Компетентны в бранжы». Плын продукує спілка KGHM NITROERG. Як стведрил Марцін Худіньскій, презес заряду KGHM Polska Miedź, помагают не лем прото, што сут то школы на обшыри мідьового басену, але тіж зато, што рыхтуют іх пізнійшых працівників.
Коментарі