Сумар дня на 3. червця/юнія 2024 р.

Приносиме вам сумар медияльной ґрупы ЛЕМ.фм+ на ден 3. червця/юнія 2024 р.

Війт ґміны Рудна стрітил ся зо священниками з реґіону

В віторок 28. мая в Уряді Ґміны Рудна одбыла ся чергова інавґурацийна стріча Війта Збіґнєва Ґрабовского. Гістми были священникы з обшыри ґміны. Порушены были квестиі тыкаючы поєдных парохій на дальшы рокы. В стрічы взяли участ м.ін. парох прахославной парохіі Воздвижыня Честного Креста в Рудній Дариюш Цьолка та парох православной парохіі святых Космы і Даміяна в Студзьонках о. Славомир Сороканич. Як подала ґміна Рудна, неодолга одбудут ся дальшы стрічы, м.ін. зо стоваришынями діючыма в ґміні, а тіж і підприємцями.

Дармове паркуваня дла Креничан

Жытелі Крениці будут мочы єдну годину денно дармо паркувати в центрі курорту. Власти Крениці уж рыхтуют ся до введіня такого злегшыня. Як подал бургомайстер Крениці Пьотр Рыба, година дармового постою повинна старчыти жытелям на найпильнійшы справы – скоры закупы, ци высланя листу на почті. Припомнул, же зона платного паркуваня находит ся коло гандльового центра, ураду, ци почты. Оператор Зоны Платного Паркуваня зрыхтує інформатичный систем, котрый позволит хоснувати безплатный постій. Крениця єст містом на правах повіту і не мат свойой базы реґістрацийных доводів, зато жытелі будут мусіти выполнити деклярацию і зголосити свій номер поізду до базы і буде то давало право до єдной дармовой годины денно. Злегшыня має быти доступне уж в тоты літні вакациі.

Польковиці выбрали представника в Звязку Польскых Міст

Польковицка Містецка Рада єдноголосло выбрала бургомайстра Вєслава Вабіка на репрезентуючого ґміну в Звязку Польскых Міст. Польковиці сут членом того стоваришыня од 1995 р. Звязок Польскых Міст был основаный, жебы сперати ідею територияльного самоуряду, боронити спільных інтересів та стремити ґу економічному і социяльно-культуральному розвиткови польскых міст. То найстарша і найвекша того типу польска самоурядова орґанізация, обєднуюча понад 350 міст. Бургомайстер Вєслав Вабік репрезентує в ней ґміну Польковиці уж черговый раз. За бургомайстром, рішаны сут там ріжны проблемы, будуваны опініі тыкаючы будучности самоурядів, тіж в квестиі фінансів територияльного самоураду.

«Меншыны і іх языкы в кризі» – промоция книжкы

Припоминаме, што уж в тым тыжни, пятницю 7. червця/юнія в Ґалериі Штукы Двір Карвациянів в Ґорлицях пройде промоция книжкы пн. «Меншыны і іх языкы в кризі», котра была выдана в рамках реализациі проєкту Языковый антодот. Публикация возникла в результаті спілпрацы дослідників з експертами з меншыновых соспільности: лемківской, кашебской, шлезской і вілямівской. Анализує ся в ній влияня досвідчаной меншынами дискримінациі на іх здоровля і добростан, але тіж хосен з бесідуваня в рідным языку ци тіж наслідства пандеміі. В опрацуваню находят ся практичны рекомендациі і розвязаня, якы можут помочы поправити обставины фунґуваня меншыновых ґруп в Польщы. Прелеґентками вчас стрічы в Ґалериі Штукы в Ґорлицях будут дві дослідничкы, активні діючы для ревітализациі языків, выдатны вчены: проф. Олена Дуць-Файфер з Ягайлоньского Університету та проф. Юстина Олько, яка веде Центр Заанґажуваных Досліджынь над Культуровым Тырваньом на Выділі «Artes Liberales», што діє при Варшавскым Університеті, а котрый то Центр был реализатором проєкту.