Голосник

Сумар дня на 3. квітня/апріля 2020 р.

Приносиме вам сумар медияльной ґрупы ЛЕМ.фм+ на ден 1. квітня/апріля 2020 р.


Пялн діянь для русиньскых вечерніх шкіл

Зо взгляду на пандемію коронавіруса і на Словациі обовязуют ріжны рестрикциі, в тым закрыто і школы. Вчыня ведене єст онляйн. Інча є ситуация з русиньскыма вечерніма школами, котры орґанізує Обчаньскє Здружыня Колысочка. Занятя проходят як добровільны додатковы пополудньовы лекциі, а грошы на них орґанізация здобыват з рамках ґрантового систему Фонду на Підпору Культуры Нацийональных Меншын. З той причыны вечерні школы не фунґуют подля шкільного рока, а календарьового. В тым році є 27 кляс, в котрых занятя веде 25 учытельок. За цілый рік заплянуваных є 37 годин на кажду клясу. Через тото, же заперли школы, русиньскы занятя не сут реалізуваны. Ведуча здружыня Колысочка – Люба Кральова, бесідує, што як школярі вернут по вакациях до шкіл, то встигнут зробити вшыткы годины, вчыня онляйн русиньского покля што не єст плянуване. Проєкт ведіня русиньскых шкіл мусит быти выполненый до кінця того рока, зато кєд бы зачали вчыти іщы пізнійше як по вакациях, то подля Кральовой, тіж не буде проблему з выполніньом годин – зрыхтуют з дітми концерты і выступліня на Миколая і Різдво, што каждого рока учытелькы роблят дармо, бо николи не старчат на тото грошы.

Поміч для Украіны

Коронавірус єст загорожыньом для цілого людства, а борба з ним буде успішна, коли никого ся не помине. Місиі Польской Гуманітарной Акциі інтенсифікуют і достосовуют діяня так, жебы як найліпше дотерати з підпором до особливо нараженых осіб. «На нашых місиях в Африці достарчаме воду, середкы чыстости і перепроваджаме школіня з гіґієны, але напр. в Украіні, зараз при лениі фронту особливі тяжка є тепер ситуация старшых осіб. То сут самітны і похворены люде, котры уж скорше вымагали гуманітарной помочы. Тераз основны є хоронити іх перед вірусом, зато рыхтуєме для них пачкы з ідлом і з гіґієнічныма річами, котры тралят безпосередньо до іх хыж» – бесідує Рафал Ґжелевскій, пресовый представник ПГА. Як можеш фінансово підтримати Польску Гуманітарну Акцию, то зайд на сайт pah.org.pl/koronawirus.

Заказ громаджынь, але до костелів на великодны свята буде мож піти

В часі конференциі, што проходила в віторок, премєр польской державы Матеуш Моравєцкій оголосил новы рестрикциі обовязуючы в звязку з пандемійом коронавіруса. Введено м.ін. заказ входити до парків, обовязок тримати два метры од інчых осіб в публичным просторі і інчы. Вшытко, жебы стримати пошырюючу ся епідемію. В розпоряджыню Рады Міністрів з 31. марця тр. мож єднак найти записы колідуючы з том ідейом. Дотепер максимальне чысло люди, якє могло быти в єдній церкви, костелі ци інчым храмі, то пят осіб. В розпоряджыню подано, же обовязує оно лем до 11. квітня/апріля, пізнійше, значыт од Великодня подля григорияньского календаря, в єдным богослужыню буде молго взяти участ аж 50 осіб. Зміны введено до одкликаня. Рішыня тото не єст згідне зо словами самых представників уряду влады і експертів, котры реґулярні остерігают, што пік епідеміі в Польщы перед нами. Перечыт тіж тому, што бесідуют, же соспільна ізоляция то найважнійше оружа в борбі з пошырюваньом ся коронавіруса.

Грошы для ґролицкого шпиталя

Фундация Бескідска Зима вєдно з Ґорлицком Ґазетом хотят купити 15 апаратів штучного дыханя на потербы ґорлицкого шпыталя. З той причыны зорґанізували кравдфандінґову акцию на сайті zrzutka.pl. Згідні з рапортом з вчера – в ґорлицкым повіті сут три особы з потвердженом хворотом COVID-19, штырі сут в шпытали, в кварантанні є 798 осіб. Неє даных о тым, кілько было проведеных тестів. Сума, яку хотят зобрати в акциі громадского фінансуваня, то 750 тис. зл. На тот момент є 1% той квоты.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі