Голосник

Сумар дня на 3. липця/юлия 2020 р.

Приносиме вам сумар медияльной ґрупы ЛЕМ.фм+ на ден 3. липця/юлия 2020 р.


Вмер наш приятель та шефредактор і основатель ЛЕМ.фм

З великым смутком і недовірьом заявляме, што вмер наш приятель, долголітній ведучый Стоварышыня Руска Бурса в Ґорлицях, шефредактор і основатель ЛЕМ.фм, а передовшыткым добрый, одданый людям і свому Народови чловек – Богдан Ґамбаль. Смерт пришла о вельо за скоро, недозваляючы му на докінчыня чысленных діл присвяченых Лемкам і Лемковині. В плянах мал іщы вельо до зробліня на річ розвитку русиньской культуры і утриманя русиньской достоменности. Мал 55 років.

В Пряшові отворили Гоноровый Консулят Польской Республикы

В віторок, 30. червця/юнія, в Пряшові отворили Гоноровый Консулят Польской Республикы. Присутный на одкрытю был амбасадор Польщы Кжыштоф Стшалка та представникы крайской і містной самосправы. Цілю новоутвореного консуляту є зліпшыти економічну спілпрацу медже державами. Як повіл аґентурі TASR гоноровый консуль Ян Гудацкій, єдночасно будут помагати польскым громадянам на териториі Словациі. Як додал Гудацкій, хотят ровивати контакты медже пряшівскым і польскым реґіонами в економічній обшыри і медже підприємцями, а тіж медже містныма і реґіональныма властями. Консулят має сідибу при улици Головній, а свою роботу зачне од понеділька, 6. липця/юлия. Своі службы буде давал в понедількы і четвергы в годинах од 9.00 до 12.00, але його працівникы будут телефонічні доступны і поза тым часом.

Вертают реґулярны і вакацийну получыня по Лемковині

Вчера транспортова компанія Voyager урухомила по перерві спричыненій пандемійом коронавіруса реґулярны получыня медже Ґорлицями а Новым Санчом. Пасажеры можут хоснувати сім курсів протягом дня. Фірма вернула тіж автобусовы получыня Краків-Берлін. А од минулой суботы, 27. червця/юнія, до желізницьового розкладу ізды вернули потяг з Мушыны до Попраду реалізуваный Словацком Желізницьом. Курсувал він буде до кінця вакаций. Окрем того, іхаючы з Мушыны, мож пересісти ся в Плавци на потяг до Пряшова реляциі Стара Любовня-Пряшів. Минулого рока желізницьове получыня Мушына-Попрад тішыло ся великом популярністю. Вакацийный потяг, котрый курсувал лем в вікедны, перевюз влони веце як 4 тис. пасажерів, зато получыня урухомлено іщы і в зимовым періоді од грудня/децембра 2019 рока до 1. марця текучого рока. Потяг Мушына-Попрад курсує в суботы і неділі, двакратні на ден. Окрем того од 4. липця/юлия рушают автобусовы получыня з Крениці до Бардийова. Будут то вікендовы і вакацийны переізды.

Атак на украіньску пару

Центр Моніторуваня Расистскых і Ксенофобічных Постав як першый поінформувал, што в неділю, 28. червця/юнія, дошло до атаку на украіньскє супружество в Ліґници. Двох Поляків выкрикувало нецензуральны слова до украіньской пары, котра сідила при столику назовни реставрациі Цирус Кебаб. Полякы зачали ображати, коли почули, што пара бесідує по украіньскы. Од вульґарной образы скоро перешли до биткы. Працівникы реставрациі поінформували о атаку поліцию, але тота приіхала аж товды, коли злочынці втекли. Вшыткы, котры были свідками того атаку і можут помочы зімати злочынців, прошены сут о контакт на адрес omzrik@gmail.com або тел.: 572 932 323. Ґарантуют анонімовіст.

Выремонтуют капличку в Бересті та крест в Лоси

Самоуряд Малопольского Воєвідства оголосил результаты конкурсу в проґрамі «Капличкы Малопольщы» о дофінансуваня ремонту вырбаных обєктів. Близко 50 памятниковых капличок, фіґур святых ци придорожных крестів буде мало ґрунтовну консервацию. Разом переданых буде 500 тис. зл. Серед успішні зарахуваных внесків нашли ся два з Лемковины. Ґміна Крениця достала дотацию на реновацию в Бересті двох придорожных стоповых капличок з фіґурами св. Йоана Хрестителя та св. Миколая, а Ґміна Ропа – на ремонт камінного креста з 1907 рока, котрый находит ся в селі Лося. Дотепер завдякы проґрамови «Капличкы Малопольщы» выремонтували веце як 470 обєктів за суму 4 млн зл.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі