Сумар дня на 3. лютого/фебруара 2025 р.

Приносиме вам сумар медияльной ґрупы ЛЕМ.фм+ на ден 3. лютого/фебруара 2025 р.

Як дале русиньскій язык? – бесіда в Музею Русиньской Культуры в Пряшові

На Словациі тырват Рік Русиньского Языка. З той нагоды ближат ся дальшы подіі, котрыма Русины припомнут 30. річницю кодифікациі русиньского языка на Словациі. Уж в тым тыжни, в четвер 6. лютого/фебруара єдна з такых подій одбуде ся в Музею Русиньской Культуры в Пряшові. Темом стрічы буде: «Як дале русиньскій язык? З нагоды 30. річниці кодифікациі русиньского языка на Словациі». Бесіда зачне ся о 14.00 год. Вступне слово выголосит Люба Кральова, яка розповіст о значыню кодифікациі русиньского языка про Русинів Словациі. Дальше буде выклад Анны Плішковой пн. «На початку кодифікациі был выбір діалекту як основа про літературный язык». Кветослава Копорова розповіст о «Змінах в правилах правопису русиньского языка протягом років». О. Франтішек Крайняк даст выклад на тему «Основа і потребніст літургічного русиньского языка». Серед прелеґентів будут і нашы редакцийный колеґы: Павел Малецкій оповіст о «Хоснуваню штучных невроновых сіти (ANN) і великых языковых моделів (LMM) з русиньскым языком», а Петро Медвідь даст доповід на тему «Кодифікация русиьского языка, наслідны зміны в правилах і іх акцептация. Хоснуваня літературного русиньского языка в русиньскых масмедиях».

Крениця штораз ближе перенятя желізничного дворця

Крениця єст штораз ближе перенятя желізничного дворця. Власти самоуряду підписали уж продажовый протокіл, а на конто желізничной спілкы PKP трафили уж грошы выникаючы з догваріня. Як подал бургомайстер Крениці Пьотр Рыба, бракує уж лем остатніх формальности, тє. вшыткых корпорацийных згід зо стороны PKP. Максимальный термін, жебы не треба было повтаряти процедуры, то 14. марця, до коли важны сут выціны. Як подал бургомайстер Рыба згідно з протоколом і переписами обовязує право первокупу Державного Засобу Нерухомостями, што значыт, же мусят підписати фінально два нотарияльны акты. Першый з них мусит быти підписаный іщы в першых двох тыжнях лютого/фебруара, жебы встигнути з підписаньом другого акту. Самоуряд дал на закуп дворця 1 млн 800 тис. злотых. Дальше конечна буде реновация будинку, котра має вынести близко 15 млн злотых. Самоуряд векшіст той квоты уж забезпечыл. В плянях, окрем пристосуваня будинку до потреб пасажерів, єст м.ін. зрыхтуваня видовисковой салі зо сценом.

Статистичны досліджыня на обшыри Малопольщы

Статистичный Уряд в Кракові інформує, што в тым році буде вюл чысленны анкєтовы баданя на обшыри малопольского воєвідства. Досліджыня будут тыкати м.ін. буджетів і кондициі домашніх господарств, економічной активности і условій жытя людности, хоснуваня інформацийно-телекомунікацийных технолоґій, здоровля, цін ци конюнктуры рільничых ґаздівок. Як подає уряд, даны зобраны в статистичных баданях сут хоронены і анкєтеры сут зобовязаны до захованя статистичной таємниці. Што важне, анкєтер ниґда не попросит о особовы даны, такы як номер PESEL ци госла. Інструкциі, як провірити леґітимацию анкєтера, находят ся на сайті Головного Статистичного Уряду.