Сумар дня на 3. марця 2021 р.

Приносиме вам сумар медияльной ґрупы ЛЕМ.фм+ на ден 3. марця 2021 р.

Сербска міністерка Ґордана Чоміч стрітила ся з Русинами

В минулу пятницю, 26. лютого/фебруара, сербска міністерка про людскы права, права меншын і социяльный діалоґ, Ґордана Чоміч, вєдно зо своіма спілпрацівниками, медже котрыма была і державный секретар ресорту Олена Папуґа, одвиділа централю Нацийонального Совіту Русинів в Рускым Керестурі. На робочій стрічы председове одборів-комісий про інформуваня, культуру, освіту і урядне хоснуваня языка і писма на челі з председом Нацийональной Рады Русинів Бориславом Сакачом бесідували про актуальны проблемы, з котрыма ся стрічают при своій роботі. Дискусия ведена была і о демоґрафічній та економічній ситуациі в Сербіі. Як єден зо способів вырішыня проблемів міністерка Чоміч підкрислила социяльный діалоґ. Спомнула і про важніст списуваня жытелів, котре і в Сербіі має проходити в тым році. Ґордана Чоміч акцентувала, же списуваня є важным, бо од його результатів буде залежала політика в слідуючых десятьох роках.

В Ґорлицях упамятнили словеньскых жолнірів

Велика подія прошла в четвер, 25. лютого/фебруара, в Ґорлицях. До міста приіхал Міністер Обороны і заступця премєра Республикы Словениі Матей Тонін. Його візита мала на ціли упамятнити словеньскых жолнірів, котры вчас І світовой войны в роках 1914-1918 згынули на фронті. В візиті товаришыла му амбасадор Словениі в Польщы Божена Форштнаріч Бороє. Присутны были власти Ґорлиц, заступця бургомайстра Лукаш Балаєвич принял делеґацию дипломатів в імени Рафала Куклі. Были тіж представникы польской арміі на челі з ґенералом Ґжеґожом Ґродзкым. В 2018 році на воєнным цмонтері но 91 одкрытый был памятник вмерлых вчас І світовой войны Словенців. Як раз гын зложеный был вінец, а світила запалили під центральным крестом.

Нове підприємство в Свиднику – социяльна фірма

В найблизшым часі місто Свидник плянує урухомити социяльне підприємство. Цілю є головні зменшыти безробітніст, особливо серед социяльно выключеных ґруп. Предметом діяльности фірмы буде предовшыткым будовляна діяльніст, повязана з розвитком містного маєтку, його утриманьом та інчы роботы. В плянах на будуче є пошырити діяльніст фірмы о вырабляня брикєтів. Початково наняти хотят 4 особы. Фінансуваня социяльного підприємства підпорене было реґіональном дотацийом Міністерства Інвестиций, Реґіонального Розвитку і Інформатизациі Словацкой Республикы. Подібна фірма фунґує уж в місті Чырч. Тота выникнула в 2018 р., тіж занимат ся головні будовляныма роботами.

Санаториі зас будут принимати курациюшів

Oд 11. марця привернене буде курортне лікуваня. Уряд влады рішыл, што санаториі можут зас быти одкрыты. Першы турнусы для осіб по вакцинациі або з неґативным тестом на коронавіруса, фінансуваны з Нацийонального Фонду Здоровля, рушат о тыжден. Фонд фурт не платит за лікуваня в санаториях постковідовців. Такє рішыня може змінити лем міністер здоровля. По близко 4 місяцях санаториі зас зачнут принимати пациєнтів. В самій Креници на курортників жде 2450 місц, в сусідній Мушыні пациєнты мают до диспозициі 900 місц. Як пояснят Данєль Лісак, шеф Бюра Креницкой Туристичной Орґанізациі, отвертя санаторий то шанса для самых курортів, жебы одбити ся од фінансового краху спричыненого заморожыньом туристуичной бранжы, бо курортникы протягом парох тыжнів турнусу хоснуют розмаіты атракциі доступны і поза санаториями. Приняти пациєнтів готовы сут так само санаториі в Высовій ци Вапенным.