Голосник

Сумар дня на 3. серпня/авґуста 2020 р.

Приносиме вам сумар медияльной ґрупы ЛЕМ.фм+ на ден 3. серпня/авґуста 2020 р.


Полномічник на поміч дискримінуваным

В Білымстоці президент покликал полномічну до справ рівного трактуваня. То реалізация єдного з пунктів самоурядового проґраму Громадяньской Коаліциі, для якой цілю было покликати полномічных до справ рівного трактуваня в великых містах в Польщы. Причыном такого діяня єст видимый проблем з рівным трактуваньом вельох соспільных ґруп: жен, нацийональных і етнічных меншын, як тіж сексуальных. Полномічный має протидіяти вшелеякым формам дискримінациі в Білымстоці, як тіж пильнувати, жебы справы рівности нашли ся і в стратеґічных документах міста. Першом активністю, яку плянує новопокликана полномічна Анна Добровольска-Цивік, буде сотворити проґрам для сеньорів, якій мал бы помагати старшым людям в обычных жытьовых ситуациях. Буде тіж принимала зголошыня од вшыткых тых, котры чуют ся дискримінуваны. Полномічна до справ рівного трактуваня буде діяла в рамках Департаменту Соспільных Справ Містецкого Уряду в Білымстоці.

О дротарях і «Дротарях» в Старій Любовни

Русиньска Оброда на Словациі, Любовняньскій Освітный Центр, культурна інституция Пряшівского Самосправного Сраю і місто Стара Любовня просят на презентацию автобіоґрафічного роману авторства Івана Кінді, пн. «Дротарі». Подія пройде уж заран, 4. серпня/авґуста, о 18.00 год. в Ґалериі Провінчный Дім в Старій Любовни.

Лемківскій музик М. Мончак просит на Фестіваль. Розпочатя на св. Горі Явір

Уж в тоту неділю, 9. серпня/авґуста, будут проходити Музичны Медитациі на св. Горі Явір «Аве Марія», будучы пролоґом V Медженародного Фестівалю „При Джерелах”. Концерт зачне ся о 18.00 годині в церкви Покровы Пресвятой Богородиці на Святій Горі Явір. Выступлят Мариюш Мончак, вызначный гушляр лемківского походжыня, та Віктор Шымайда, якій заграт на фортепіяно. Орґанізаторами подіі сут Фундация Арс Актіва і парохія св. Михала Архангела в Высовій.

В Кыйові буде мож прохаджяти ся улицьом Епіфана Дровняка

В четвер 30. липця/юлия в Кыйові на Украіні містецка рада украіьской столиці єдноголосно схвалила рішыня надати мено, або пременувати дакотры улиці і скверы в місті. Єдна з кыівскых улиц буде тепер называна іменом єдного з найвызначнійшых Лемків ХХ ст., славного в цілым світі артисты, маляря примітивісты родом з Крениці – Никыфора Дровняка. Пременувана буде ул. Георгія Димитрова – діяча болгарского та медженародного комуністичного руху.

Альтренатива для переполненых туристами пути

Бєщадскій Нацийональный Парк припоминат о новоодкрытым одтинку жолтого пути – з Выжнього Перевалу (Перевалу над Берегами) на Діл. Єст то добря альтернатива для інчых пути, якы сут того рока полны туристів. Траса веде залісеным, лагідным схылом аж до вяты на вершыні Ділу. Мож одтамаль позерати на прекрасный ляндшафт, м.ін. Ветлиньску Полонину зо Смереком та Цариньску Полонину. Верхом Ділу веде зеленый пут, якым мож піти в сторону Малой Равкы, або зыйти до Ветлины. Час прогулькы горі то 1 год. 10 мин., а долов – 40 мин. Білеты вступу мож купити в інформацийно-касовым пункті при вході на пут, або на інтернетовым сайті Бєщадского Нацийонального Парку.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі