Сумар дня на 3. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 3. серпня/авґуста 2021 р.

Чырч має новы думкы на розвиток

Як інформує аґентура SITA, село хоче побудувати кемпінґ на своій обшыри. Нова інвестиция заняла бы 5 тис. квадратных метрів, находила бы ся при головній дорозі, а єй кошт то близко 150 тис. евро. Презначеный буде до ночуваня в шатрах ци караванах, а до диспозициі туристів будут і социяльны заряджыня. Плянує ся, же в будучым кемпінґ збогаченый буде в хыжкы, котры бы ся дали арендувати. Як зазначыл староста Михал Дідик, то добра нагода для села про розвиток туристикы. Чырч находит ся близко польско-словацкой границі та інчых туристичных міст, як Крениця ци Мушына. Дідик надіє ся, же реализация проєкту зачне ся до пятьох років.

18. едиция Ярмаку Ікон – як было того рока?

В остатній вікенд липця/юлия в Саноку одбыла 18. едиция Ярмаку Ікон. На рынку уставили ся артисты зо своіма стоісками, з малярскыма творами, ткацкыма выробами і різбами, а аж і з локальныма стравами. Ярмак зачал ся в пятницю, 30. липця/юлия, концертом ансамблю Вернигора, пак в наступны два дни на сцені запрезентували ся іщы ансамблі Відимо, Тріо Фамілийне та ученикы з музичной школы. В часі подіі прошла тіж промоция альбому «Тихій Мемориял» – стріча з Андрийом Потоцкым і Аркадиюшом Андрейковом. Додатково в рамках ярмаку можна было взяти участ в плястичных ци гончарскых варштатах.

Свято Лосяньскых Мазярів уж в тот вікенд 

Мазярска Загорода в Лоси просит на неділю, 8. серпня/авґуста, на шторічну подію Свято Лосяньскых Мазярів. Головном темом буде дерево, конечне для мазярів. Як і в попередніх роках, орґанізаторы задбали о богатый в атракциі проґрам подіі. В часі стрічы ведены будут ріжного рода варштаты – Надлісництво Лося проведе тоты о грибах, котры роснут на деревах, і о дестиляциі ропы, окрем того можна буде навчыти ся робити лжыці і різбити в дереві. Наступны атракциі то выпаляня дегтю, плетіня вінків, наука гафтуваня та показы і прелекциі на тему дерев і іх выкорыстуваня. На дакус молодшых участників акциі жде будуваня малого мазярского возу або лемківской хыжы, а для наймолодшых зрыхтуваны сут забавы і малюваня. Не бракне і музичных атракций, в часі свята на сцені запрезентує ся ансамбль Капеля Древутня з Люблина і локальна ґрупа Руты Увіты з Юлийом Дошном.

Оркєстра св. Миколая выступит в Коросні

Етноцентр в Коросні просит на суботу, 7. серпня/авґуста, на концерт Оркєстры св. Миколая, єдного з найбарже знаных фольковых ансамблів. Ґрупа возникла понад 30 років тому, за тот час выдали більше як 10 альбомів. Свою творчіст основали на польскій традициі, народных піснях з Любельщыны, Підгаля та Малопольщы. В композициях навязуют і до лемківскых і гуцульскых звуків. Концерт зачне ся о 19.00 год. на пляци перед Етноцентром, вступ єст свобідный, але чысло місц ограничене.