Сумар дня на 3. січня/януара 2020 р.

Приносиме вам сумар медияльной ґрупы ЛЕМ.фм+ на ден 3. січня/януара 2020 р.

Ремонт церкви в Туряньску

Тырвают модернізацийно-консерваторскы роботы православной церкви св. Михала Архангела в Туряньску на східній Лемковині. То вынятковый храм, понеже од 2013 р. находит ся на Листі Світовой Спадковины UNESCO. В рамках веденых прац буде приверненый давный выгляд святыні. На основі фотоґрафіі з 1936 р., котру зробил Фнанцішек Стжалко, можливе одтворіня елементів даху церкви, котрый ріжнит ся од днешнього. Фотоґрафія вказує, што перше бані были веце профілюваны. З той причыны, в позволіню од Підкарпатского Воєвідского Консерватора Забытків введеный был варунок односячый ся до схоснуваня бляхы як материялу до вкрытя даху, вежычок і профілів – так, жебы модернізация привернула давный вид церкви. Ведены роботы обнимают тіж стіны і зовнішній шалюнок. Вшыткы працы вымагают належного старунку прото, што внутрі церкви находит ся – будучый уж консервациі – цінный розпис. Працы ведены сут завдякы середкам з Міністерства Культуры і Нацийональной Спадковины. Фінал передвиджено на конец 2020 рока.

Пісні Павла Стефановского

Павел Стефановскій, выдатный лемківскій писменник і громадскій діяч, ротягом 2019 рока выдал авторску збірку пісен. В книжочці, до котрой залучена єст платня з награнями співу самого автора, поміщены сут выключно його авторскы тексты. Част з публикуваных пісен была придумана і записана Стефановскым дост давно тому – на зламі 50. і 60. років ХХ ст. Збірка находит в собі дедикацию од діти автора – Лідиі і Штефана Стефановскых з нагоды його 87 уродин. Вводне слово приправил Мирослав Боґонь. Він тіж зробил професийный запис нот і гармонізацию каждой пісні. Ціле выданя, окрем вступу, єст зрыхтуване по лемківскы. Автором окладинкы єст проф. Леон Тарасевич, творячый в Польщы маляр білоруского походжыня. Павел Стефановскій до увагы слухачів представлят 16 авторскых творів. Серед них находят ся найперше авторскы пісні, але тіж і выдуманы мельодиі танців. При каждым творі єст ориґінальный авторскій запис слів і спомянута аранжация од Мирослава Боґоня, до музикы, котра придумана Павлом Стефановскым. Хоц выданя пісен взріло світ в 2019 р., награня были зареґіструваны 25. вересня/септембра 2016 р. в хыжы автора в Білянці. До каждой пісні залучене єст награня зо співом автора. Єдна з пісен під наголовком В далекій край єст заспівана з мельодичным підмазом. Як пише Мирослав Боґонь, пісня тота мат велику артистичну, сентиментальну, особисту вартіст для самого автора.

Нова Бесіда

Кінцьом 2019 рока напечатаный был послідній номер часопису Бесіда за місяці листопад-груден, в котрым окрем шырокого змісту находит ся і долученый «Календар Бесіды» на Новый 2020 Рік. Календар як што рока находит в собі вшыткы найважнійшы церковны свята подля юлияньского рахуваня, як і імена покровителів на каждый ден. Окрем того, в остатнім номері Бесіды чытати можеме текст Ольгы Пелехах про минулы змаганя Лемковина Ультра-Трейль. Наталия Малецка-Новак написала про вчыня лемківского языка в шкільным році 2019/2020. Начальный редактор часопису, Петро Трохановскій приносит чытачам реляцию з ювілею долголітнього учытеля лемківского языка на чужыні, Укача Возняка. В часописі чытати можеме і інформацию про остатнє засіданя Світовой Рады Русинів в Хорвациі, про котре пише Богдан Ґамбаль. Севериян Косовскій публикує два тексты. Першый про упамятніня 30. річниці основаня Стоваришыня Лемків в Ліґници, другій про заклик до підписуваня петициі до Інцистуту Нацийональной Памяти в справі таблиці, котра мала быти одкрыта во Фльоринці. В Бесіді чытати мож і дальшы тексты, як хоц бы обшырну реляцию з минулой Лемківской Творчой Осени, ци ювілейный текст Петра Трохановского про Александра Павловича.

Веселых Свят!

Ближат ся Різдвны Свята за юлияньскым календарьом. 6. січня/януара вшыткы, котры празднуют Рождество за східньом традицийом засядут до родинной велиі. З той нагоды цілый ансамбль медияльной ґрупы ЛЕМ.фм хоче желати вшыткым Лемкам, де бы они не были розметены по цілым світі, веселых і родинных Свят. Наше лемківскє радийо в тот вынятковый час буде емітувало специяльны вязанкы коляд і вінчуваня. Най новонародженый Христос принесе добру новину вшыткым нашым слухачам і чытатам. Уж тепер поздравляме вшыткых: Веселых Свят! Христос ся Раждає!

фот. www.gospodarkapodkarpacka.pl