Сумар дня на 3. січня/януара 2023 р.

Приносиме вам сумар медияльной ґрупы ЛЕМ.фм+ на ден 3. січня/януара 2023 р.

Миколай Ляш выріжненый

1. січня/януаря Словацка Республика святкувала 30 років істнуваня. З той нагоды президентка державы Зузана Чапутова оцінила 28 осіб звязаных з політиком, культуром, науком ци активізмом, котры дали вклад до доброго мена Словациі дома і заграницьом. В церемоніі участ брали найвысшы представникы сусідніх держав, м.ін. президент Польщы Анджей Дуда ци віцепремєрка Украіны Іріна Верещук. Участныма были тіж представникы русиньской меншыны – члены президиі Округлого Стола Русинів Словациі і єдночасно члены Выбору про нацийональны меншыны і етнічны ґрупы Рады Влады Словацкой Республикы – Петро Медвід і Мілян Ян Піліп. Серед выріжненых нашол ся Миколай Ляш, русиньскій актор, трибун Баршановой Революциі в Пряшові і бывшый председа Русиньской Оброды. Ляш был нагородженый in memoriam Орденом Людовіта Штура ІІІ клясы за вынятковы заслугы для демокрациі і розвитку Словацкой Республикы, головно при кодифікациі русиньского языка. Одзначыня за Миколая Ляша одобрала його жена Кляра Ляшова.

Будут наступны курсы на трасі з Польковиц до Любіна

Од січня/януара власти міста Польковиц дополнили розклад ізды автобусів о два додатковы получыня в робочы дни і два в вікенды. Разом буде аж 28 додатковых курсів в тыжни, што – як надіют ся польковицкы власти – розвяже проблем жытелів обох міст звязаный з комунікацийом. Новы получыня то одповід на многы зголошыня і внескы жытелів Польковиц, котры інформували, што в даякых порах дня тяжше єст ся ім достати до працы ци школы в Любіні. Увагы мешканців покрывали ся тіж з анализами веденыма містом, котры ясно вказали, што найбільше пасажерів іздит в поранных і пополудньовых годинах. Зато додатковы автобусы будут ходити як раз в тых годинах. Як підкрислают власти, новы получыня будут підданы анализам і кєд вкаже ся, што годины не сут аж так добрі допасуваны, то од 1. лютого/фебруара мож буде іх скориґувати.

Крениця з енерґоощадным освітліньом

В курорті тырват выміна лямп на енерґоощадны, котры значучо зменшат ґмінны рахункы за енерґію. Выміна тыкат зміны вішаків і світильників з содовых на ледовы. Єднак на двох улицях Пілсудского і Пулавского треба вымінити цілы лямпы. Як передал бургомайстер Крениці Пьотр Рыба, рахуваный кошт выміны на тых двох улицях то коло 2 млн зл. З той причыны місто буде аплікувало о дофінансуваня, бо самы не сут в силі провести так коштовных змін. Поза тыма двома улицями до кінця каденциі бургомайстра в цілій Креници буде уж лем ледове освітліня. Додатково того рока ледовы лямпы будут тіж замонтуваны при локальных улицях во вшыткых місцевостях в ґміні Крениця.

Ґміна Санкова з рекордово высокым буджетом на інвестициі

В остатню пятницю 2022 рока ґміна Санкова схвалила буджет на новый рік. Запрезентуваный буджет передвиідує інвестициі на рекордову квоту понад 35 млн зл, што становит близко 60% загального буджету. Серед плянів сут м.ін. початок будовы крытого басену в Санковій, стежкы в коронах дерев з Вапенным, сенсорично-природничый парк, будова водопроводной інфраструктуры, модернізация доріг і будова ходників.