Сумар дня на 3. вересня/септембра 2021 р.

Приносиме вам сумар медияльной ґрупы ЛЕМ.фм+ на ден 3. вересня/септембра 2021 р.

31. Ружова Заградка

Уж в тоту неділю, 5 вересня/септембра, в Новым Саді в Сербіі пройде 31. Фестіваль Новой Русиньской Народной Співанкы «Ружова Заградка». Запрезентуваных буде 16 новых композиций, з котрых в голосуваню выбраны будут найліпшы. Выконаных буде тіж девят композиций переробленых з народных творів. О нагородах рішыт конкурсова комісия. З огляду на епідемію коронавіруса участ в фестівали можут взяти лем тоты, котры приняли вакцину, мают неґативный результат антиґенового тесту або тесту PCR, або мают потверджыня, же хворіли Covid-19. Вшыткы присутны мусят носити маскы. Перенос з Фестівалю буде мож обзерати і слухати так в телевізиі і радию, як і онляйн.

Послідній курс на трасі Ясло-Крениця-Ясло

Перед нами остатні желізницьовы курсы на трасі Ясло-Крениця-Ясло. Włóczykij одыйде з креницкого дворця послідній раз в тым сезоні уж в тоту неділю, 5. вересня/септембра, о год. 17.53. Вакацийне получыня Малопольскых Желізниц фунґує од 3. липця/юлия тр. Курс вказал ся великым успіхом. За Адамом Філяром, основательом ґрупы Kolej na Jasło, в рекордовы вікенды до Крениці доізджало тым потягом аж і парусот осіб. Лем в липци/юлию в страну Крениці поіхало ним понад 1000 осіб. В плянах єст дальше ожывляня желізницьовых леній. Получыня Ясло-Крениця-Ясло має ся найти в розкладі зимовых вікендовых получынь.

Малопольскій Фестіваль Смаку в Креници

Од днес до неділі, 5. вересня/септембра, в Креници проходит Малопольскій Фестіваль Смаку. Імпреза орґанізувана Самоурядом Малопольского Воєвідства вертат по річній перерві спричыненій пандемійом коронавіруса. Крениця єст остатнім з міст, в котрым в тым році гостит Фестіваль. Од липця/юлия одбывал ся він іщы в Старым Санчы, Тухові, Выґєлзові і Мєхові. Як обіцюют орґанізаторы, жытелі Малопольщы зас будут мати нагоду посмакувати реґіональны, традицийны продукты і стравы. В тым році орґанізаторы поставили на локальных, малопольскых продуцентів. В проґрамі м.ін. показы варіня, деґустациі, стоіска з реґіональныма продуктами, конкурс на найліпшый продукт і выступы музичных ансамблів.

4. піше поломництво на праздник св. Максима Ґорлицкого

Братство Православной Молодежы Перемышльско-Ґорлицкой Єпархіі просит на четверте піше поломництво на праздник св. Максима Ґорлицкого. Поломництво з благословліня владыкы Паісия пройде в тоту неділю, 5. вересня/септембра. Зачне ся о 6.00 год. літургійом в церкви Покровы Пресвятой Богородиці в Ждыни, пак поломникы рушат до Ґорлиц. О 18.00 год. в катедральній церкви Святой Тройці в Ґорлицях зачне ся Всеночна. Записы на поломництво тырвают до суботы, 4. вересня/септембра. Більше деталів находит ся на фейсбуковым сайті Братства.